Match hnih atan Ronaldo an hrem

Cristiano Ronaldo chu match hnih chhung inkhel thei lo tura hrem a ni. Hrem a nih chhan hi Al Nassr leh Al Hilal ten Saudi Super Cup semifinal an khelh ṭuma hnawhchhuah a nih vang a ni.

Ronaldo hian Al Hilal defender Ali Al-Bulaihi chu khelmual sirah a nghawk, a hmain yellow card pek lo ni tawh mah se match referee chuan red card (straight red card) a phawrh nghal.

Portugal captain hi 2022 December thla khan Manchester United nen inṭhenin Al-Nassr a zawm a, Saudi Arabia ramah chuan tun ṭum hi red card a hmuh hmasak ber a ni.

Ronaldo-a'n a nghawk Ali Al-Bulaihi hian tun hmain player langsar lakah chanchin a lo nei zauh zauh tawh. Lionel Messi, Neymar, Luis Suarez leh Son Heung-min te nen pawh boruak a lo nei tawh bawk.

Al Nassr tan season awlsam a ni lo. Saudi Super Cup aṭangin an tla a, Saudi Pro League lamah pawh pahnihna an ni mek, an chunga awm Al Hilal chu point 12 ngawtin an phak lo, league match khelh hmabak match sarih chauh an neih tawh avangin champion beiseina a bo tluk a ni tawh.