Nomawi duhtu Liverpool hmaah Atalanta

Liverpool fan-te tan 2021-22 season kha theihnghilh a har viau ang - season tawp thlengin nomawi pali beiseina nen hun an hmang a, a tawp an khar dan erawh FA Cup leh League Cup a ni a, an chawi châk Champions League leh Premier League nomawi an chawi ta lo.

Tun season-ah pawh Liverpool hian March thla laihawl vel thleng kha chuan inelna pali an telnaah champion an beisei vek - mahse, nomawi pakhat chauhin season an khar lo ang tih a sawi theih loh. FA Cup quarterfinal aṭangin an hmelma Manchester United-in an pet chhuak a, Premier League-ah Red Devils hi an inhnehtawkpui zui avangin hmahruaitu an nihna chu an hloh a, table-ah pahnihna an ni mek bawk.

Tun season-a League Cup champion tawh Liverpool hian Europa League-ah beiseina an la nei a, mahse, quarterfinal-a an hmachhawn tur hi Italian club ṭha Atalanta a ni. Zanin dar 12:30 hian first leg khel turin an mikhual dawn a, Liverpool tan tlawm a thiang lo.

Champions League 2020-21 season-ah khan team pahnih hi group stage-ah an awm dun a, khualmualah 5-0 in Reds chak mah se, Andfield-ah 2-0 in an tlawm tih hriat a ṭha.

Klopp, i tan aw

Liverpool boss Jurgen Klopp-a'n season tawp rualin Reds a chhuahsan dawn tih hi thuthar a ni tawh lo a, Liverpool fan-ten a ropui thei ang bera an coach ropui hi thlah an duh - chumi tur chuan League Cup champion nih rikngawt a tawk lo.

Premier League leh Europa League nomawi tel ngei chunga Liverpool khawpuia kawng zawh a, a phu ang ngeia Klopp thlah hi fan-ten an châk a, chumi tur erawh chuan Reds tlarhmaten inṭhelhsiak loh an chin a ṭul.

United laka an chance neih zozaite kha thlir ila, Liverpool-in an hun ṭha neih an chhawr loh an tuar. Zaninah Reds-in khatiang kha thlen nawntir an duh loh chuan goal hmaa 'hriam' an zir a ṭul a, Mohamed Salah goal khung loh zanah pawh lo khung ve 'thiam' an mamawh.

Zaninah Salah chu bul ṭan leh ngei tura ngaih a ni a, Darwin Nunez chu chawlh hahdamna pek a nih a rinawm a, chuti a nih chuan tlarhmaah Salah, Luis Diaz leh Cody Gakpo te an inkawp thei ang.

Chanchin lawmawm

Tun season-ah hliam vangin Liverpool an buai ngun a, mahse, Reds ṭantute tan chanchin lawmawm a awm. Hliam vanga chawl mek Alisson Becker (malpui), Trent Alexander-Arnold (khup) leh Diogo Jota (khup) te chuan training pangngai an zawm leh tawh a, Stefan Bajcetic (chawn) pawh a training ṭan ve leh ta.

Chutihrual chuan player palite hi Atalanta hmachhawn tur chuan an inpeih a la rinawm chiah lo a, Joel Matip (khup), Ben Doak (khup) leh Thiago Alcantara (tihrawl) te erawh season tawp thlengin chhawr an ni tawh kher lo ang.

Liverpool-in United an 'draw' chhan langsar tak chu Jarell Quansah chesual kha a ni a, kum 21 mi defender hi game boruak sang danga chhawr zui ai chuan chawlh hahdamtir a fuh zawkin a rinawm a, Ibrahima Konate leh Virgil van Dijk te tlarhnung laiah an inkawp thei ang.

Rawlthar Conor Bradley aiah Joe Gomez chu right back hna chelh tura beisei a ni a, mual vei lamah Andy Robertson a awm ang. Midfield-ah Dominik Szoboszlai, Wataru Endō leh Alexis Mac Allister te an inkawp leh mai a rinawm.

Atalanta an ṭha

Anfield-a inkhel tur an nih avangin Liverpool an inringtawk ang tih a chiang a, chutihrual chuan Atalanta hi kum 2016 aṭanga enkawl tawhtu Gian Piero Gasperini enkawlna hnuaiah an la khel a, team hlauhawma he Italian club phochhuaktu hi a nih avangin zuam sual theih an ni.

Reds tana chanchin lawmawm erawh centre back Giorgio Scalvini inlan thei lo tur hi a ni a, kum 20 mi defender hi Manchester United nena sawizawm mek niin, Scalvini tel lohna tlarhnung hi Reds player-ten an zuam sawt ang.

Mahse, Atalanta striker Gianluca Scamacca chuan, "Eng team pawh hmachhawn turin kan ṭha tawk. Anfield-ah hnehna chan ngei tumin kan leng dawn a ni," a ti a, Liverpool chu Europe-a team ṭha ber pawl ni mah se hneh theih a inbeisei thu a sawi.

Italy international Scamacca hian tun season match 32 a khelhah goal 11 khungin, assist vawi thum a nei tawh a, tlarhmaa a kawp tur Ademola Lookman hian match 32-ah vek goal kua leh assist vawi li a nei bawk - Liverpool tana chhinchhiah ṭul ber erawh match 37-a goal 13 leh assist vawi li nei tawh, Dutch midfielder Teun Koopmeiners a ni ang.