Leverkusen kawng dal tumtu Hammers

Bayer Leverkusen-in tun season inelna hrang hrangah match 41 khel tawhin tlawm an la nei lo a, match 36-ah hnehna changin, match nga chu an khingpui an inhnehtawkpui - he thawnthu hi West Ham chuan thlak danglam an tum.

Bundesliga nomawi chawi thei dinhmuna ding mek Leverkusen hian zanin dar 12:30-ah Europa League quarterfinal first leg khel turin West Ham an mikhual dawn a, David Moyes-a enkawl team hi zuam sual theih tak an ni.

Hammers defender Kurt Zouma chuan, "Leverkusen hi rei tak chhung chu an tlawm tawh lo tih kan hria a, chumi thlak danglam hna chu kan kutah a awm ta. Nomawi chawi kan duh chuan team ṭha ber kan hneh zel a ngai a, chutiang tak chuan tih kan tum ang," a ti.

West Ham hian season hmasa lawk khan Europa Conference League nomawi an chawi a, English club ṭha ber ni lo mah se, hmachhawn an châkawm bik lo - Xabi Alonso leh a naute tan fimkhur a ṭul ang.

Leverkusen hian Bundesliga-ah point 16 ngawta falin hma an hruai mek a, Pathianni zana Werder Bremen an hneh chuan an champion tawh dawn - chu mai a ni lo, German Cup final an lut tawh bawk a, he team hian nomawi pathum nena season khar an châk ang.

Bundesliga-ah an champion chiang, tiin a sawi theih a, German Cup final-a an tum tur hi second division club Kaiserslautern an ni a, Europa League hi tun dinhmuna an tana chona hautak ber tia chhal theih a ni.

Alonso chuan, "Cup leh Bundesliga-ah champion thei dinhmunah kan ding tawh a, Europa League-ah pawh a sang thei ang ber thlen kan duh. West Ham kan mikhual dawn a, tun dinhmunah chuan kar tawp buaipui thei kan ni lo," a ti a, kar tawp league match-a chak a, Bundesliga champion nih an ngaihtuah hman loh thu a sawi.

Leverkusen hian an club chanchinah 1988 UEFA Cup leh 1993 German Cup an champion bak kha nomawi chawi an la nei leh lo a, tun season-ah club history ziak danglam dawrh turin hun ṭha an nei.

Chutihrual chuan Leverkusen hi an zinkawngah an vannei ve bawk - round of 16-a Qarabag an hmachhawn ṭumte khan, first leg leh second leg inkhelah, minute 70 chhungin 2-0 in an hnufual ve ve a, mahse, a tawpah comeback ropui lantirin quarterfinal an lut.

Zanina an hmachhawn tur Hammers hian round of 16-ah SC Freiburg chu 5-1 in an thlah a, German club an hlau lo ang.