Highlander beisei a bo

Indian Super League-ah pawh league round an khel zo hnai a, Thawhlehni zan khan Chennaiyin FC chuan 2-1 in NorthEast United an hneh a, Highlander-in playoff khelh beiseina an neih chu a thamral.

Highlander tan Jithin MS chuan minute 49-naah goal hmahruai khung mah se, Chennaiyin hian Aakash Sangwan leh Ankit Mukherjee hmangin an chhanglet a, 2-1 in an chak.

NorthEast United tan playoff khelh phak beiseina a bo zui a, Chennaiyin tan beisei a sang sawt - Pathianni zana an league match hnuhnung berah FC Goa laka point an hlawhchhuah chuan playoff knockout khel turin an tling ang.

Chennaiyin hnuai chiahah hian East Bengal awmin, anni pawhin playoff khelh phak an la beisei. Mahse, match tawp bera Chennaiyin tlawm a ngai thung - Chennai an tlawm a, East Bengal hian Punjab FC an hneh chuan an point hmuh zat a inang ang a, head-to-head a chungnung zawk East Bengal an tlang daih thei.

Nizan khan East Bengal hian an league match hnuhnung ber khelin, an result kan hre hman lo. Zirtawpni zan inkhel hmasa zawkah FC Goa chuan 3-2 in Jamshedpur FC an hneh - Men of Steel tan Rei Tachikawa chuan goal hmahruai khung mah se, Goa hian Noah Sadaoui leh Carlos Martinez hmangin an chhanglet.

Khalid Jamil-a team tan Seiminlen Doungel chuan si phurh a sut ve leh a, mahse, hun pek belhah Goa tan Borja Herrera chuan chakna goal a khung a ni. JFC tan PC Laldinpuia'n inkhel bul ṭanin, Ricky Lallawmawma chu bench aṭangin a lut.