PSG tan Barcelona an la u hret!

Champions League vawi nga champion tawh Barcelona chuan goal an phurh hnuah Paris Saint Germain chu 3-2 in an hneh a, semifinal lut turin an dinhmun an siamṭha viau, hmabak erawh a la hautak dawn.

April 16, Thawhlehni zan hian Nou Camp-ah second leg an khelh leh dawn. Xavi Hernandez-a naute tan tlang turin mahni goal venhim a tawk a, chutihrualin Ligue 1 champion tan pawh beisei bo erawh a la ni bik lo.

A hma boruak

Inkhel ṭan hmain Luis Enrique chuan tun hma lama Barcelona a enkawl tawh thu a sawi a, Catalan club khelh dan phung chu tuna an manager Xavi aiin a lantir ṭha zawk tih a sawi, coach tawnhriat ngah zawk hian a chhaih hmasa zauh.

Paris khawpui chhunga khelmual hmingthang Parc des Princes-ah mipui an fuankhawm a, mikhual Barcelona manager Xavi chuan tawnhriat ngah Robert Lewandowski leh Ilkay Gundogan te a ringtawk a, bul ṭantu zingah a telh.

Anni panhnih kiangah hian kum 17 mi centre back Pau Cubarsi leh kum 16 mi Lamine Yamal te pawh bul a ṭantir, anni pahnih hian Champions League quarterfinal-a inkhel bul ṭan thei naupang record an siam hial.

PSG lamin an thiampuipa Kylian Mbappe chu Ligue 1 lama an hawhchawlhtir zauh zauh hnuah an chhawr a, France captain hi inkhel pawimawhah chuan an la thlauh thla phal lo - Catalan club hmachhawn tur hian Ousmane Dembele nen mual sirah an awm.

A hmuhnawm

Goal khung tuma khel ngam ve ve an ni a, a tir aṭangin inkhel a hmuhnawm nghal. Corner aṭanga ball kal chu Lewandowski-a'n lo tauh mah se goal line aṭangin defender Nuno Mendes-a'n a lo pet chhuak hman - Raphinha chuan Gianluigi Donnarumma tan han hautak a siam bawk.

Raphinha hian a hun ṭha hmasa pahnih a chhawr thei lo, mahse minute 37-naah a hun a inherchhuak. Mual sir aṭanga Yamal-a cross chu keeper Donnarumma-a'n Lewy khawih hmain a lo nem per hman, mahse ball per hi Raphinha chuan chiang zetin a lo khung.

Chawlhlawk laiin PSG chu si khat faiin an hnufual. Second half tirah Dembele a inlar - France international hian box chhungah chiang zetin Frenkie de Jong a bum a, keeper Marc-André ter Stegen tana dan ngaihna awm lo khawpa kawhin a hlap lut zui.

PSG an phur zui a, midfielder Fabian Ruiz-a'n box chhunga fing zetin ball a la lut a, a changtu Vitinha chuan angle zim angreng tak aṭangin a khung, a tira hnufual zawk khan 2-1 in hma an hruai daih. Barca goal chhuah pahnihah De Jong a mualpho tia sawi theih a ni bawk.

A tawpah Barca

Tun hma deuh khan Unai Emery hoin Paris Saint Germain hian Barcelona lakah goal li an neih an hum thei lo tawh, tun ṭum inkhelah pawh hian 2-1 in hma hruai mah se inkhel a la tawp lo, goal khung belh theihna remchang an neih an chhawr lo bawk.

Goal hnih an neih hnu lawkah substitute Bradley Barcola chuan hnai angreng tak aṭangin goal bar a pet per pawp, keeper Ter Stegen-a'n dang thei lo mah se bar-in a lo dansak a ni ber mai, lut ngat se la chuan Xavi naute tan thawhchhuah a harsa tawh ang.

Mahse, hun pawimawh laiah Spain midfielder Pedri-a'n a thiam thil lantirin a kangin ball hlauhawm a dah lut a, a tir aṭanga khel ṭha tak Raphinha chuan lei a thlen hmain a hlap lut zawt, minute 62 a nih chuan team pahnih te 2-2 in an inhnehtawk.

Dembele bawk kan hmu, mahse France international hian goal ban a pet per - PSG lam goal hmaah an vannei tawk lo. A hnu lawkah Barcelona defender Andreas Christensen chuan Gundogan-a corner pet chu chakna goal atan a tauhlut, ven loha dahtu Paris club lamin pawi an tikhawp ang.