Atletico Madrid-in Borussia Dortmund an ngam

Mahni league lama beisei phak lo pahnih Atletico Madrid leh Borussia Dortmund ten Champions League hmangin an lungawi lohna thai bo an tum a, Nilaini zan khan quarterfinal first leg-ah an intawng.

Atletico Madrid khelmualah mualneitu Atletico an chungnung zawk a, German club hi 2-1 in an lo hneh - Spanish club tan Rodrigo de Paul leh Samuel Lino ten first half chhungin goal khat ve ve an khung a, Dortmdund tan Sebastien Haller chuan si phurh sut ṭhen mah se goal dang an khung thei lo.

Diego Simeone nauten 2-1 in hnehna an chang a, La Liga lama champion beisei tawh lo team hi hlim takin an nui ve leh ta. Chutihrual chuan first leg chauh a la ni tih hriat a ṭha a, Dortmund khelmual lamah second leg an la khel leh dawn.

A goal hma

Wanda Metropolitano khelmualah goal hmu turin kan nghah rei a ngai lo. Minute lina lekah Rodrigo de Paul chuan Dutch fullback Ian Maatsen-a ball pass muang lutuk a nangching a, harsatna nei loin goal-ah a chantir zui.

Atletico-in inkhel an thunun zui a, na takin Dortmund an nawr a, an insiamrem ve hret tawh emaw tih hnu, minute 32-naah German club hi an chesual leh ta nge nge. Mats Hummels leh Nico Schlotterbeck ten ball throw-in satliah tauh chhuah an tumna lamah an inringthul.

Hei hi Alvaro Morata chuan lo chang fuhin, Antoine Griezmann a pe zui a, French forward hian mahnia pet mai loin ven loha awm Lino tan a siamsak zui - Brazilian wing back hian goal-ah a chantir a, 2-0 a ni der.

Beiseina

Atletico-in 2-0 a hmahruai chungin chawlhlawk an hmang a, Dortmund tan comeback a harsa tawh dawn tih a lang. Mahse, German club hi an tlawm mai duh bik lo - minute 81-naah Sebastien Haller chuan si phurh sut ṭhenna goal a khung a, 2-1 a ni.

Dortmund-in goal an khung hnuah Hummels a chesual leh a, mahse, German defender tawnhriat nei ṭha hian ama tihsual hi amah vekin a thup mawi - Angel Correa-a shot nei tur chu a tibuai hman a, tibuai hman kher lo se, a goal ngeiin a rinawm.

German club tan Jamie Bynoe-Gittens chuan penalty box pawn aṭangin kawh pawtin crossbar a pet per zui a, a uiawm takzet. Kum 19 mi English winger hi Manchester City academy-a awm tawh niin, Dortmund tan tun season-ah match 26 khela goal hnih khungin, assist vawi sarih a nei a, chhinchhiah bik a sual lo ang.

Dortmund an vannei

Atletico khelmualah tlawm mah se, goal khat an khung a, mahni mualah second leg an la khelh leh dawn bawk avangin Dortmund hi hnual lutuk tur an ni lo - an khelh dan thlir phei chuan, chak lo mah se, an vannei, tia sawi pawh ni ila, tu'n min dem lo ang.

Spanish club tan minute lina leka De Paul-a'n goal a khung hma daih tawh khan Morata chuan chance a nei daih tawh a, Lino-a chance neih hnai set sawta Dortmund keeper Gregor Kobel-a'n a dante chu pui tak a ni.

Dortmund hian chance nei lo tawp erawh an ni bik lo. Maatsen-a shot ṭha lutuk Jan Oblak-a'n a dansak kha goal ngat se, first half a la nih avangin inkhel thawnthu a danglam hial mai thei.

Tlawm duh lo

First half-ah Dortmund an che fuh tawk lo a, second half-ah erawh an insiamṭha. Coach Edin Terzic-a'n substitution a siam fuh a, minute 45-naa luhtir Julian Brandt chu Dortmund goal nawr kawnga player thawhhlawk a ni - a chnace neih bar tihper nana a hmante chu uiawm tak a ni.

Dortmund boss Terzic chuan, "Inkhel ṭantir lam minute 30 kha chu kan tiṭha thlawt lo a, hetiang ang level-ah meuh chuan khati zat tihsual neih chuan kan tlawm tawh, tihna a ni tlangpui.

"Mahse, kan rilru kan tipaukhauh tlat a, kan tlawm duh lo a, kan theihna kan pholang a ni," a ti a, Dortmund captain Emre Can chuan, "Ball chang tura kan inchuhin kan hneh lo hret ṭhin a ni," tiin an khelh dan a thlirlet ve bawk.

Atletico an ṭha

La Liga table-a palina ni mek Atletico tan Dortmund hneh hi result ṭha a ni a, Inrinni zan league match-a Girona an mikhual tur atan inrintawkna an neih belh ang.

Atletico boss Simeone chuan, "Kan goal nawr a ṭha a, a hunah ball kan chhuhsak a, first half-ah kha chuan chance an nei lo deuh thaw a ni," tiin an khingpui team an hneh dan a sawi. Quarterfinal-ah meuh chuan hnehna chan a awlsam lo a, kan chak thei hi ka lawm hle," a ti.

Griezmann chuan, "Inkhel kan thunun tia sawi ngam niin ka hre lo. A chhan chu second half-ah khan min nawr hneh em a ni. Goal thumna khung theihna chance pawh kan nei a, mahse, second half-ah kha chuan a harsa khawp mai," a ti a, Dortmund a fak.