MFA Cup final-ah Aizawl vs Lawngtlai

MFA Cup vawi 22-na semifinal-ah Aizawl club FC Bethlehem chuan Siaha club Model United FC 3-2 in an hneh a, inkhel dangah inelna thlengtu Lawngtlai club MLS FC-in Lunglei club Venglai FC an hneh ve bawk. MLS leh Venglai FC te hi hun pangngaiah 1-1 in an inhnehtawk a, extra time-ah B. Lalramthlengliana leh Richard Rohmingliana ten Lawngtlai tan an khung a, inelna thlengtu hi 3-2 in an chak.

Final hi CYLA Ground, Lawngtlaiah April 13, Inrinni tlai dar 2:00 hian FC Bethlehem leh MLS FC te an inkhel ang. MFA Cup hnuhnung pahnihah Champhai club an champion a, FC Bethlehem hian MFA Cup nomawi la chawi lo mah se Aizawl club erawhin record an nei ṭha. Lawngtlai club an la champion ngai lo a, inelna an thlen ṭumah coach Vanlalpeka hoin champion an tum dawn a ni.

Bethlehem an kal zel

Aizawl District First Division champion FC Bethlehem-in Model United FC lakah bul an ṭan ṭha a, Aizawl FC junior aṭanga an lak RH Laltlanhlua hmangin minute 19-naah hma an hruai a. Minute thum hnuah Siaha player Hmingthanmawia'n an lamah a tilut ve bawk.

Group A hmahruaitu Siaha an beidawng lo a, first half tawp hma ṭepin FC Pahnai hmanga sut ṭhenin second half-ah Francis Remruatsaka hmangin siphurh an sut zo. Siaha-in beiseina sang tak nei mah se injury time-ah Joseph Lalṭhafela'n yard 25-na vel aṭangin freekick aṭangin chakna goal a khung. Joseph hi ADFA First Division-a a zawna best player ni thei a ni a, LPS Cup-ah Sihphir Venghlun champion puiin best player-a thlan a ni leh bawk.

Lawngtlai tan Mahmingtea

Lawngtlai club MLS FC-in MFA Cup atan inpuahchahna an nei ṭha a, an thawhrim rah sengin Lunglei club Venglai FC chu minute 120 chhungin 3-1 in an hneh.

Hun pangngaiah Lungleiin bul an ṭan ṭha a, HPC Cup top scorer Lalthanzuala'n minute 21-naah goal hmahruai a khung. Lunglei hian goal khat hi chakpui an tum a, defensive game an khel zui. Lawngtlai lamin na takin an nawr a, tun inelnaa goal khung vanga hming chher Mahmingtea hmangin minute 86-naah siphurh an sut a, extra time an khelh a ṭul phah.

Extra time-ah MLS fitness neih ṭhat a lang a, inkhel ṭan chiahah B. Lalramthlengliana'n a ball ṭha hmuh chu la lutin goal pawimawh bik a khung. Minute 99-naah Lunglei goalkeeper-in a dang ṭha tawk lo a, a per chu Mahmingtea'n a khung. Mahmingtea'n semifinal-ah hattrick siamna hun ṭha a bawhpelh a, tun inelnaah erawh goal kua khung tawhin top scorer a ni mek.

Extra time second half-ah Lunglei tan Lalduhsanga Chhakchhuakin siphurh a sut ṭhen a, goal dang khung nan minute 10 dang nei mah se MLS Club an ṭangtluan. Lawngtlaiin a vawi khat nan coach Peka hoin MFA final an lut.