Taekwondo exam an bei

Mizoram Amateur Taekwondo Association chuan nimin khan 1st Session Colour Belt Exam a buatsaih. Exam bul ṭanna Aizawl district-ah club 11 aṭangin taekwondo zirlai mi 141 zetin exam ṭha takin an paltlang.

Aizawla exam buatsaihna pui ber, Electric Veng Indoor Hall-ah yellow belt aṭanga red belt inkar mi 133 ten exam an bei a. Black belt exam thei tura inbuatsaih mek mi pariatten Red-1 exam an bei bawk a ni.

Exam hi Lalinpuia (2nd Dan Black belt) hoin black belt H. Vanlalfela, Vanlalmawipuia, Vanlalthlenga ten uluk takin theory leh practical exam an endik a. Physical Fitness, basic technique, hand & leg technique, poomsae, self defence, sparring, breaking, speed endurance te an exam a ni.

Exam zingah blue one exam beitu April Lallianmawii, Upper Repulic veng, Republic Veng Taekwondo Club-a zir mek chu mark hmu ṭha berin exam tiṭha ber lawmman a dawng.

Colour belt exam hi Myanmar medalist Olivia Thawngluai, Master VL Sawma, Master Joseph Thansanga leh Senior Black Belt Lalrinawma Sailo ten an hmanpui a ni.

1st Session Colour Belt exam hi district hrang hrangah chhunzawm a ni bawk ang.