Mohammedan nomawi chawi zana MC tur Mizo pa

Tun season I League match hnuhnung ber chu April 13, Inrinni zanah khelh a ni dawn a, Mohammedan SC-in nomawi an chawi dawn. Kolkata club hian match hnuhnung berah Delhi FC an hmachhawn dawn a, inkhel pawimawh bika match commissioner tur chu Mizo pa R. Malsawma (Asawma) a ni.

Asawma hi Mizo zinga I League-a match commissioner hna chelh hmasa ber a ni a, 2021-22 season aṭang khan I League-ah MC hna hi a thawk tawh. Tun season-ah I League match 18-ah MC hna a chelh tawh a, Mohammedan nomawi chawi zan hi vawi 19-na tur chiah a ni.

Mohammedan hian I league match tam zawk hi Naihati Bankimanjali Stadium-ah khel a, match tawp ber erawh an I League thuneitute an dil angin Salt Lake Stadium-ah an khel dawn. India rama stadium lak Salt Lake Stadium-ah pawh Asawma hi a mikhual lo a, kum 2021 khan Durand Cup-ah MC hna hi a chelh tawh.

Chanmari pa Asawma chuan, "ISL ai hian I League-ah hian chona a tam zawkin ka hria. ISL club chuan stadium ṭha leh ground ṭha tak an nei vek a, player-te tan pawh khelh a nuam dawn. I league-ah erawh stadium ṭha tak tak nei ve bawk mah se a tam zawkin ground ṭha an nei lo. Artificial turf hmang pawh club 4/5 vel lai an awm a playing condition a in an loh avangin team tan inbuatsaih thiam a har dawn," tiin Vanglaini a hrilh.

Indian football hrechiangtu Asawma chuan sawi chhunzawmin, "I League club-te hi an budget an inthlau a, Mohammedan an champion chhan pakhat chu foreigner an neih ṭhat vang a tih theih. Chutihrualin I League hi a level a sang a, India probables-a awm phak chu an phu. Chung zingah chuan Lalrinzuala (AFC), Edmund Lalrindika (Inter Kashi), F. Lalremsanga leh David Lalhlansanga (Mohammedan ve ve) te hian National team-a koh hi an phu ka ti," tiin I League a hmuh dan a sawi.