Clay-ah Medvedev a chak

Daniil Medvedev tan clay court hi hmun ṭha a ni ngai lo a, champion chu sawi loh vawi khat chak chauh pawh a harsa ṭhin. Monte Carlos Masters khelh laiah Medvedev hian bul a ṭan fuh, a khingpui Gael Monfils chu 6-2, 6-4 in a hneh.

Season hmasa khan Medvedev hian Rome khawpuiah nomawi a chawi a, atan thil mak a ni. Mahse, a hnu lawka khelh French Open-ah chuan hneh nei loin a tla, kuminah chuan beisei a neih san thu a sawi.

Kum 28 mi Medvedev chuan, "Season hmasa khan clay court tournament pawh ṭha takin ka khel thei a ni tih a takin ka lantir a, ka hlawhtlinna khan inrintawkna nasa tak min siamsak, tunah ṭha takin bul ka ṭan leh bawk.

"Tuna kan tournament khelh lai hi best of three hmanga chak zawk zawn a ni a, ka ngaihdan chuan clay-ah hian set nga pawh khel turin ka inpeih tawh. French Open leh Rome Open kha danglamna awm loa khelh ka tum ang," a ti.

Clay court season an hmang mek a, inelna lian ber French Open 2024 chu May thla chawhnu lam aṭangin an khel dawn, Grand Slam champion nih tum tan chuan tun hi inbuatsaihna hun ṭha leh a vanglai tak a ni.

Inkhel dangah Andrey Rublev a chak lo - champion lai Rublev hian second round lekah a khingpui Alexei Popyrin chu 6-4, 6-4 in a hneh, seeded pawh chang phak lo Popyrin hian a match lehpekah chuan Alex de Minaur a tum leh ang.

Seeded 12-na Stefanos Tsitsipas pawhin third round a lut. Greek tlangval hian Tomas Etcheverry chu straight set hmangin a hneh a, a hmabak chu Alexander Zverev a ni dawn. German star Zverev hian Sebastian Ofner a hneh a, seeded pariatna Casper Ruud pawhin Alejandro Tabilo chu 6-2, 6-4 in a hneh.