Punjab-in East Bengal an sawp Playoff khel tur a hriat kim ta

Indian Super League inkhelah Nilaini zan khan Punjab FC chuan 4-1 in East Bengal an sawp a, Kolkata club playoff khelh beiseina an tihtawpsak - Chennaiyin tan result lawmawm a ni nghal a, South Indian club hian playoff an khel dawn.

East Bengal sawptu

I League champion Punjab tan Wilmar Jordan Gil chuan minute 19-naah goal hmahruai a khung a, Kolkata club-in minute ruk hnuah Sayan Banerjee hmangin chhanglet mah se Punjab club chhaih kawlhna goal mai a ni.

PFC tan East Bengal nena sawizawm hlawh Madih Talal chuan chawlhlawk hmain amah duhtu club lakah goal a khung belh a, Colombian forward Wilmar Jordan leh Luka Majcen ten goal khat dang khung ve lehin, 4-1 in Punjab FC an chak a, ISL-a an season hmasa ber an khar chhe lo.

Season hmasaa I League nomawi an chawi avanga ISL khel PFC hian league match 22-ah vawi ruk hnehna changin, vawi ruk draw an nei a, vawi 10 an tlawm thung.

Playoff chu

ISL-ah league match 22 khelh ṭhin a ni a, league round la khel zo lo mah se playoff khel tur a hriat kim tawh. Mumbai City, FC Goa, Mohun Bagan SG, Odisha, Kerala Blasters leh Chennaiyin ten playoff an khel dawn.

League hmahruaitu leh pahnihna te chu playoff semifinal khel turin an tling nghal ṭhin a, pathumna aṭanga paruknain playoff knockout an khel thung - team pali hi playoff knockout-ah intawngin, a chak zawk pahnihin semifinal-ah table-a pakhatna leh pahnihna an zawm ve leh ṭhin thung.

Mumbai chu semifinal lut chiang tawh an ni a, semifinal lut tur dang a la chiang lo. Playoff knockout hi single leg-a khelh tur niin, April 19 & 20-ah khelh a ni ang a, semifinal hi double leg-a khelh tur niin, April 23, 24, 28 leh 29-ah khelh a ni ang - final hi May 4-ah khelh tur a ni.