Messi hoin Inter Miami an tla

Lionel Messi inkhel thei leh tawh mah se Inter Miami an che fuh thei chuang lo. Nimin zing khan Miami hian Monterry chu 3-1 in an hneh lo a, an intawn hmasak tawhna nen belhkhawmin Mexican club hi 5-2 a chakin Concacaf Champions Cup semifinal an lut.

Estadio BBVA-a inkhelah mualneitu Monterrey tan Brandon Vazquez, German Berterame leh Jesus Gallardo ten goal an khung a, goal thum an phurh hnuah Inter Miami defender Jordi Alba hnawhchhuah niin hun tawp dawna Diego Gomez goal khungin awmzia a nei phak lo.

An intawn hmasakin Inter Miami hi 2-1 in an chak lo, hemi ṭum hian Messi chu hliam vangin a khel thei lo. Tun ṭumah hian inlan thei tawh mah se Argentina captain hian goal a keng tel bik rih lo a, an zinkawng a tawp a ni.

Tunah chuan Inter Miami hian Major League Soccer lam an ngaihtuah leh thung a ngai dawn. MLS Eastern Conference table-ah pathumna an ni mek a, season hmasa kha chuan a mawngphah lamah an awm a, kuminah chuan team ṭha dangte elphak an tum ang.