A chung berah Jokic awmna Nuggets

Nikola Jokic-a point 41 hmangin Denver Nuggets chuan Minnesota Timberwolves chu 116-107 in an hneh a, an chak avang hian Western Conference table chung berah an lawn chho leh ta.

Nimin zing inkhelah Jokic-a hian rebound vawi 11 a la a, assist ṭum sarih a neih bakah an khingpui te ball vawi thum chhuhsak bawkin Nuggets chak theih nan a thawhhlawk takzet.

NBA regular season bikah Denver hian khelh hmabak pahnih chauh an nei tawh, anmahni hnaih bertu Timberwolves an hneh tak avangin a chung bera awm tlang turin an dinhmun an siam ṭha ta hle.

Western Conference inkhel dangah Phoenix Suns chuan Devin Booker-a point 37 neih hmangin Los Angeles Clippers chu 124-108 in an hneh a, play-in khel phak turin Suns hi an dinhmun a ṭha tawk ta bawk.

NBA regular season a zawh hnu hian team pariat ten playoff an khel ṭhin, table pahniha a sang zual parukte chu playoff khel turin an tling nghal. Hmun ruak dang pahnih la awm hi 10-na chin ten play-in hmangin an zawng leh dawn a ni.