Mohammedan nomawi chawi zan

Mizo paruk awmna Mohammedan SC chuan zanin hian Salt Lake Stadium-ah I League nomawi an chawi dawn ta a, Kolkata club captain hi Mizo pa Zodingliana Ralte a ni. Mohammedan hian zanin dar 6:00 hian Delhi FC an hmachawn ang a, hemi zawh hian nomawi chawina an nei dawn.

Kolkata-ah club lian pathum Mohun Bagan, East Bengal leh Mohammedan an awm a, season tharah chuan Indian Super League an khel vek dawn. Mariners hian I League nomawi vawi hnih an chawi tawh a, East Bengal-in an la chawi lo - Mohammedan-in an chawi khalh dawn tihna a ni.

Mohammedan hian nomawi chawi hunah mipui ṭhahnem tak an beisei a, en man pawh a awm dawn lo. Football ngainatna hmun Kolkata mipuiin Salt Lake Stadium an pan khawm dawn a, kum 133-a upa club chanchina hun ropui bik tiin a sawi theih.

Kolkata club-ah hian Adinga bakah Mizo player David Lalhlansanga, Lalremsanga Fanai, Samuel Lalmuanpuia, Vanlalzuidika leh Lalbiakhlua Jongte te an awm a, champion-na kawngah Mizo tlangvalten an thawh hlawk hle.

Armed Veng defender Adinga chuan, "I League nomawi ṭum hnih ka chawi tawh a, tun ṭum hi captain ka nih vangte pawh a ni ang. Ka tan chuan, ka football career-a hlu ber anga sawi theih a ni," tiin Vanglaini a hrilh. Mohammedan captain chuan champion tawh mah se Russian coach Andrey Chernyshov hnuaiah training dan ngai renga an kal thu a sawi.

Zanina Delhi an hmachhawn hunah inhliam vangin Lengpui tlangval Remsanga squad-ah a awm theih a rinawm lo a, player dang panga Adinga, David-a, Samuel, Zuidika leh Biakhlua te erawh squad-a awm ngei tura ngaih an ni.

Vairengte striker David-a leh Remsanga te hi Aizawl FC chherchhuah liau liau tia sawi theih an ni a, Adinga leh Samuel te hi Mizo club tan an khel tawh bawk.