RFDL-ah Home Missions Vs Delhi FC

Reliance Foundation Development League national group stage-ah Mizoram aiawh Home Missions FC chuan April 14, Pathianni chawhma dar 11:00 hian Delhi FC an hmachhawn dawn. Home Mission FC hi group C-ah NE United FC, East Bengal FC, Delhi, Adamas United SA te nen an awm ho a, group khat aṭangin stage sang zawk khel turin pakhat chauh an tling ang.

Delhi-in group C inkhel hi an thleng a, Home Missions khingpui hmasa ber tur hi inelna thlengtu tiin a sawi theih. RFDL hi Under 21 inelna a ni a, squad-ah Under 23 player 10 dah theih ni mah se playing XI-ah pathum aia tam a theih loh thung. Chanmari hian pahnih chiah an nei - Thanglalven Gangte leh Ephraim Lalremtluanga te chauh an kawl.

Home Mission FC hi Chanmari FC captain leh coach hlui Rochhingpuia'n a ho a, squad-ah hian Santosh Trophy hnuhnung bera Mizoram squad-a awm Ephraim Lalremtluanga leh Laltluangliana te an awm a, MPL10-a che ṭha an awm nual bawk.

Chanmari FC midfielder Thanglalven Gangte, F. Malsawm-dawngpuia leh Electric Veng FC midfielder KC Malsawmsanga te bakah Chinga Veng FC winger Isac Zomuanpuia leh Chawnpui winger Tea Chinzah te chu player langsar zinga mi an ni.