Liverpool tan nomawi pakhat a liam leh ta?

March thlatir thlenga nomawi pali beiseina neitu Liverpool-in momawi pakhat an thlauh leh ta, tiin a sawi theih - Ningani zan khan Europa League quarterfinal first leg-ah Atalanta chu 3-0 in an ngam lo a, Anfield-a tlawm an nih avangin an mualphona belhchhahin a awm.

Inkhelh hmaa Liverpool hneh an tum thu sawitu Gianluca Scamacca chuan thu chu thiltihin a nemnghet a, Reds lakah goal hnih a khung - Mario Pasalic chuan goal khat a thawh ve bawk a, Liverpool-in a chhanletna tur an nei lo.

Second leg khelh tur la awm mah se, team pahnih intawnna tur hi Atalanta khelmual a ni tawh dawn a, 3-0 ngawta an hnufual bawk avangin Jurgen Klopp-a naute tan 'comeback' a harsa tawh dawn - Atalanta hi Serie A-ah parukna an ni mek a, hmahruaitu Inter Milan chu point 32-in an phak lo mek!

League Cup champion Liverpool-in FA Cup an mangṭha tawh a, Premier League-ah pahnihnaah an tla thla a, Europa League mangṭha thei dinhmunah an ding bawk. Liverpool fans tan lawmna tur a vang rih hle.

An zuam sual

Liverpool-in an league match hnuhnung berah an goal khung theih loh an tuar a, Manchester United chu 2-2 in an inhnehtawkpui hram. Premier League chung ber aṭangin pahnihnaah an tla thla zui a, Europa League quarterfinal-in a lo hmuak zui.

Reds hian Pathianni zan dar 6:30-ah league match khel turin Crystal Palace an mikhual zui dawn a, hei hi Jurgen Klopp chuan hre rengin Italian club lakah a player neih ṭhat ber a thawhchhuahpui lo.

Mohamed Salah chu bench lamah a awm a, Luis Diaz, Dominik Szoboszlai leh Andy Robertson pawh bench lamah dah niin, hliam damkawr Diogo Jota leh Trent Alexander Arnold ten bul an la ṭan lo bawk.

Klopp-a player rem dan thlirin, Europa League a ngaihlu tawk lo, tiin a sawi theih a, Atalanta a zuam hret, tiin a sawi theih bawk - a khawi zawk zawk pawh ni se, thudik chu Klopp-a'n thutlukna a siam sual, tih hi a ni.

Hremna chu

Anfield-ah Liverpool khelin beisei a phak lo a, fan-ten an hmuh duh football hmuhnawm en tur an nei lo. Minute 38-naah Scamacca chuan goal hmahruai a khung a, West Ham forward hlui shot naran tak anga lang chu Reds keeper Caoimhin Kelleher chuan a dang thei lo.

Liverpool fan-ten Alisson an ngai zual sawt ang tih a chiang a, Kelleher-a'n chet ṭhat chang nei mah se, Brazilian keeper pheikhawk a inthawlh zo meuh lo a ni ber - goal dang lut loin chawlhlawk hman a ni.

Second half-ah Liverpool ṭantuten inkhel hmuhnawm an beisei a, an hmuh hmasak zawk erawh an lama goal lut lai bawk a ni. Minute 60-naah Charles De Ketelaere-a ball cross chu ven loha awm Scamacca chuan goal-ah a chantir a, Anfield a reh.

Liverpool an insiamṭha chuang lo - Scamacca-a'n duhthala hmun awl a neih hnuah Ederson a siamsak a, vengtu mumal awm lo karah Brazilian midfielder hian shot-in, Kelleher chuan dang mah se, a per lehlam chu Pasalic hian goal-ah a lo chantir.

A pawi zo ta

Liverpool tlarhnung a pherh takzet a, midfield-in awmzia an nei lo a, tlarhmain an chance neih ve goal-a chantir an harsat bawk. Ball an chanin holam taka hloh an ching a, tlarhnungin an tih tur an ti tawk lo a, tihsual a tam êm êm.

Atalanta vanneih zan ni se, goal tam zawk khung thei hial an ni a, hei hian inkhel awmzia a hrilhfiah. Atalanta tan ven loha awm Teun Koopmeiners-a chance neih Kelleher-a'n a dansakte chu, Liverpool vanneihna pholangtu a ni.

Tlarhmaah Reds an hriam tawk lo bawk - Darwin Nunez chuan vawi hnih ngawt goal khung theih ngeina chance a nei a, mahse, Uruguayan striker hian goal-ah a chantir thei lo a, top class striker tia chhal theih a la nih loh chhan a pholang.

Harvey Elliott-a'n bar a pet per a, bench aṭanga luhtir Mohamed Salah-a'n chance duhawm nei mah se Atalanta keeper Juan Musso chuan ṭha zetin a dansak a, a tawpah chak phu zawk Atalanta-in 3-0 in hnehna an chang. Liverpool tana chanchin lawmawm chu Diogo Jota leh Trent Alexander-Arnold an dam ta chu a ni a, Jota hi bench aṭangin a lut.

Hmabak chu

Liverpool-in Pathianni zan dar 6:30-ah Crystal Palace an mikhual dawn a, April 18, Ningani zanah Atalanta chu khualmualah an lenchilh zui ang - Klopp-a'n semifinal luh a duh chuan inkhek a hun tawh lo.

Chutihrual chuan Premier League chu German coach ngaih pawimawh ber a ni lo thei lo a, Atalanta an lenchilh zawh, April 21 zanah Reds hian Fulham chu khualmualah an lenchilh dawn a, Klopp-a tan player remthiam a pawimawh khawp ang.

Premier League inum boruak sang zelah Arsenal-in point 71 hmuin hma an hruai mek a, league match sarih bak khelh tur awm tawh loah Liverpool nen an point hmuh zat inang mah se, goal difference-a an ṭhat fal nalh avangin Gunners hian hma an hruai.

Arsenal hian Pathianni zan dar 9:00-ah Champions League khelh tum Aston Villa an mikhual dawn a, City-in zanin dar 7:30-ah Luton Town an mikhual dawn thung - Premier League a 'hot' belh zel e.