Quarterfinal-ah Djokovic a lut

Novak Djokovic chuan nikuma a ngam loh Lorenzo Musetti a hneh let a, harsa lutuk loin Monte Carlo Masters khelh laiah quarterfinal a inhlangkai a, nizan khan Alex de Minaur nen inkhelin result erawh kan hre hman lo.

Nikum Monte Carlo Masters-ah khan Djokovic leh Musetti-a te hi last 16-ah tho an intawng a, world number 1 Novak zawk hi a chak lo. Tun ṭumah erawh thawnthu danglam tawhin 7-5, 6-3 in a chak zawkah a ṭang.

Kum 36 mi Djokovic hian vawi 10 ngawt mai Monte Carlos quarterfinal a luhna a ni a, Open Era chinah chuan hetiang tithei pahnihna chiah a ni, major title 24 chawi tawhtu hian sulhnu a nei ṭha hle.

Inkhel dangah Daniil Medvedev erawh a chak lo. Russian tlangval hian a match hmasa zawka hnehna a chan hnuah a phur thu sawi mah se result ṭha a nei chhunzawm lo - amah ang bawka Russian mi Karen Khachanov lakah 6-3, 7-5 in a tlawm.

Medvedev hi hard court-a inkhel thiam a ni a, season hmasa khan mak tak maiin clay court inelna Rome Open-ah a champion, kuminah result ṭha beisei ve leh viau mah se tun hma lama a sulhnu ṭha lo ang bawkin a chesual leh ta zawk a ni.

A chak zawk Khachanov hian Stefanos Tsitsipas a tum leh dawn. Greek tlangval Tsitsipas hian champion tua rinkai zinga mi Alexander Zverev chu 7-5, 7-6 (7-3) in a lo hneh ve thung.

Seeded pahnihna Jannik Sinner erawh a chak. Australian Open champion lai hian Jan-Lennard Struff chu 6-4, 6-2 in a hneh a, seeded pakuana Grigor Dimitrov hnehtu Holger Rune a hmachhawn leh ang.