Alonso naute champion hun?

Xabi Alonso enkawl Bayer Leverkusen chuan Pathianni zan dar 9:00 hian Werder Bremen an mikhual dawn, an chak a nih chuan a vawi khat nan German rama football inelna sang ber Bundesliga champion an ni ang.

Zanin dar 7:00 hian champion lai Bayern Munich chuan Cologne an mikhual dawn. Bavarians hi an tlawm a nih chuan Alonso naute hi an inkhelh hma hauhin an champion fel der dawn a, hei erawh a thleng kher lo mai thei.

A tawi zawnga sawi chuan Alonso naute tan midang ngaihchan a ngai tawh lo. Anmahni khelmual BayArena-ah ngei hnehna chang chunga champion a châkawm ang a, chumi tur chuan fans lam pawh match dang zawng aiin an boruak a sang zawkin a rinawm.

Leverkusen tan season duhawm a nih dan hi a thuah hnih hle. German Cup final an lut tawh a, league champion ni thei mai dinhmunah an din bakah hneh loh nei loa champion hmasa ber ni turin kawng dik an la zawh zel - match hmabak paruk chauh an nei tawh.

A la tawp mai lo - Ningani zan khan Europa League quarterfinal fist leg-ah West Ham United chu 2-0 in an hneh, khualmualah si hnih faia an chak avangin semifinal lut turin an dinhmun a ṭha takzet tawh bawk, kumkhua a sawi hlawh tawh tur sulhnu hnutchhiah turin an inpeih tihna a ni.

Leverkusen hian Bundesliga nomawi an la chawi ngai loh avangin 'Neverkusen' tiin an sawi fiam ṭhin, club dangten an chhaihna thumal pakhat thai bo laia awm ve nih châkin fans an sahawk dawn - Pathianni zan hian mi 30,210 lenna stadium hi a khat hneh khawp ang.