Arsenal mikhual tur Villa inbuatsaih ṭha

Premier League hmahruaitu Arsenal chuan Pathianni zan dar 9:00 hian Aston Villa an lo mikhual dawn. Unai Emery naute hi season thara Champions League khelh tum ve tho an ni a, team ṭha an nih bawk avangin inkhel a hmuhnawm ang.

Gunners hi Bayern Munich nena Champions League khel chau an ni a, mahse kar laihawla an inkhelh hah hi chhuanlam atana hman theih a ni dawn lo. Villa hian Europa Conference League an khel ve tho a, ni khatin hahchawlhna hun an nei tlem zawk hial.

Villa hian Ninganin zan khan an mikhual Lille chu 2-1 in an lo hneh, striker ṭha Ollie Watkins leh John McGinn ten goal khat ve ve an khung a, inkhel chau deuh mah se Gunners lenchilh tur atana inbuatsaihna ṭha tak a ni ngei ang.

Mikel Arteta-a'n UCL ngaihtuah chunga player a siksawi duh a nih pawhin buaina a neih a rinawm loh. Match hnuhnung bera bul ṭan lo aṭangin Takehiro Tomiyasu, Thomas Partey, Leandro Trossard leh Gabriel Jesus te chu bul ṭan turin an ṭha tawk vek.

Nipui bazar laia beiseina sang tak nena an lei, league match hmasa bera inhliam nghal Jurrien Timber pawhin thla khat chhung team training a zawm tawh a, a ṭul a nih chuan Dutch defender hi chhawr theih turin a inpeih tawh bawk.

Kum 2024 bikah chuan Arsenal hi Premier League team ṭha bik tia sawi theih an ni, goal an khung tamin an tlarhnung a phui bawk - Villa lakah hian point thum an hmu leh a nih chuan champion beiseina a sang zual ngei ang.

Aston Villa tan pawh inkhel pawimawh a ni dawn, a sang zual pali zinga tel ngei an duh a nih chuan chetsual a rem bik lo. Gunners bakah hian Chelsea leh Liverpool an la hmachhawn dawn a, hna a la hautak dawn takzet a ni.