La Liga an khel ve leh dawn ta

Copa del Rey final khelh a nih avangin kar hmasa khan La Liga match a awm lo a, nizan aṭang khan Spanish top flight league hi khelh ṭan a ni leh tawh - nizan khan Real Betis leh Celta Vigo inkhelin, an result kan hre hman lo.

Spanish club langsar Atletico Madrid, Real Madrid leh Barcelona te pawh zaninah an inlan vek dawn a, tlai dar 5:30-a Atletico leh Girona inkhel tur hi en a châkawm.

Atletico hian tun season La Liga-ah beisei an phak lo a, zanina an hmachhawn tur Girona hi beisei phak baka season hmang ṭhatu an ni thung - team pahnihin an tum ber chu Champions League khelh phak a ni a, a hmuhnawm dawn.

Real Madrid-in zanin dar 10:00-ah Real Mallorca an lenchilh dawn a, Copa del Rey final-a tlawm hlim Mallorca hi La Liga inhamtan tum an ni a, season a tawp hnaih tawh bawk si avangin tawh an khirh ang.

Carlo Ancelotti naute hian Thawhlehni zan khan Manchester City chu Champions League-ah mikhualin, 3-3 in an inhnehtawk a, Nilaini zan hian City hi an lenchilh leh dawn - hemi zawhah hian El Clasico khelh tur an nei leh bawk!

King Carlo tan squad siksawi thiam a ṭul tihna a ni a, Brahim Diaz, Joselu leh Luka Modric te chu Mallorca laka bul ṭan tura beisei a ni a, defender Eder Militao pawh hliam vanga a chawlh reng hnuin bul ṭan tura beisei a ni.

Paris Saint-Germain nena Champions League khel chau Barcelona-in zanin dar 12:30-ah Cadiz an lenchilh dawn a, Catalan club hian champion an la beisei ve reng avangin tlawm a thiang lo. Mahse, anni pawh Thawhlehni zana PSG la hmachhawn leh tur an ni a, French club an mikhual zawhah Real an hmachhawn dawn!

Mahse, Real aiin Barca zinkawng a zia hret - PSG lakah 3-2 in an chak a, second leg hi Nou Camp-a khelh tur a nih bawk avangin an zin chau dawn lo. Tun kar thil thlen dan hian La Liga nomawi chawi tur thui takin a hril ang.