Thutlukna awlsam a ni lo - Quartararo

Tun hnai khan Fabio Quartararo chuan Yamaha tan contract a ziak thar a, kum 2024 thleng daih inremna an neih tawh sa chu kum 2026 thleng atan an pawtsei a, amah leh team tan contract thar ziah chu thil awlsam a nih loh thu a sawi.

Quartararo hian engzat chiah nge a hlawh dawn tih chu chiang taka tarlan a ni lo. Mahse, khawthlang chanchinbu mite chuan kum khatah euro maktaduai 12 a hlawh zel dawn niin an sawi thung.

Kum 24 mi Quartararo chuan, "Zep tur a awm lo, team dang nen pawh kan inbe ngei mai. Mihring chuan hmasawn zel kan duh a, chumi tur chuan eng hi nge kan tana ṭha ber ang tih ngaihtuah a ngai ṭhin.

"Portugal-a intlansiak kan neih ṭum khan Yamaha thuneitu sangte nen kan inbia a, chutah chuan nakkum leh kum 2026 tawp thlenga thil tum leh hlenchhuah turte min hrilh a, kei chuan chona thar ṭha tak niah ka ngai.

"Kan inremna leh hmalak dan tur hi sawi vek chi a ni lem lo, a chhan chu Yamaha tan thuruk a ni. Thil chiang taka sawi ngam erawh chuan hamsawn tumin, theihtawpin hmalam kan pan dawn," a ti.

Bike intlansiakna sang berah hian kum 2021 khan Quartararo hi a champion a, season hmasa erawh kha chuan point 172 hmuin 10-na a ni. Tun season kal laiah 11-na niin podium a la lawn phak lo thung.

Pathianni zan dar 12:30 hian kumina a pathumna atan Grand Prix of the Americas an tlan dawn, tun hnaia contract thar boruak ṭha nen result duhawm zawk neih theih ngei a beisei ngei ang.