Bagan-in Bengaluru an sawp!

Ningani zan Indian Super League inkhelah Mohun Bagan SG chuan 4-0 ngawtin Bengaluru an sawp a, league winner nih beiseina an la nei ve zel - Kolkata club tan Hector Yuste, Manvir Singh, Anirudh Thapa leh Armando Sadiku ten goal khat ṭheuh an khung a, Bangalore club-in a chhanletna tur an nei lo.

Bagan tan midfielder Lalrinliana Hnamte (Terina) chu bench aṭangin a lut a, Bengaluru tan rawlthar ṭhangduang Lalremtluanga Fanai chu bench aṭangin a lut bawk.

Bagan-in hnehna an chan avangin table-ah pahnihna an ni a, hmahruaitu Mumbai City an phak lohna chu point hnih chauh a ni tawh. Thawhṭanni zan dar 7:30-ah team pahnih an intawng dawn a, he inkhela chak zawk hian league winners shield an dawng ang.

ISL-ah league round khelh zawh hnuin, knockout hmangin champion tur zawn ṭhin a ni a, mahse, Asian Football Confederation danah league-a hmahruaitu ngei lo chu champion-ah pawm theih an ni lo.

Hei vang hian ISL-a league round-a pakhatna chu league winner tih ṭhin an ni a, AFC Champions League group stage khel tura an tlin bakah cheng vaibelchhe thum an dawng ṭhin bawk a, a hlu vet vet hle.

Mumbai hian point 47 neiin hma an hruai mek a, Bagan hian point hnih chiahin an phak lo mek - league match khat bak khelh tur a awm tawh lo a, Lallianzuala Chhangte, Lalengmawia Ralte leh Hmingthanmawia Ralte khelhna Mumbai hian point khat chiah an hlawh pawhin league winner an ni dawn a, Bagan tan chak a ngai thung.

ISL-ah league match 22 khelh ṭhin a ni a, Mumbai leh Bagan inkhel tur hi league round match hnuhnung ber a ni. Mumbai City, FC Goa, Mohun Bagan SG, Odisha, Kerala Blasters leh Chennaiyin te chu playoff khel tur an ni.

League hmahruaitu leh pahnihna te chu playoff semifinal khel turin an tling nghal ṭhin a, pathumna aṭanga paruknain playoff knockout an khel thung - team pali hi playoff knockout-ah intawngin, a chak zawk pahnihin semifinal-ah table-a pakhatna leh pahnihna an zawm ve leh ṭhin thung.

Mumbai chu semifinal lut chiang tawh an ni a, Bagan-in Mumbai laka point an hlawhchhuah hrim hrim chuan semifinal an khel dawn a, Pathianni zan dar 7:30-ah FC Goa-in Chennaiyin an hneh a, Bagan an tlawm bawk chuan Goan club-in head-to-head a an record ṭha avangin semifinal an khel ang.

Playoff knockout hi single leg-a khelh tur niin, April 19 & 20-ah khelh a ni ang a, semifinal hi double leg-a khelh tur niin, April 23, 24, 28 leh 29-ah khelh a ni ang - final hi May 4-ah khelh tur a ni.