Mumbai Indians an mualah an hrang

Indian Premier League-ah Royal Challengers Bengaluru-in 196 runs zet siam mah se mualneitu Mumbai Indians-in over 15.3 lekah 199/3 runs siamin wicket sarihin hnehna an chang.

Wankhede Stadium-ah Virat Kohli-a'n run thum lek a siam a, Faf du Plessis-a'n 61 runs a siam bakah over tawp berah Dinesh Karthik a rawn che ṭha. DK-a'n ball 23 leka 53 runs a siam zarah Bengaluru-in 196 runs an siam a, chak thei dinhmunah an ding.

Mahse, Wankhede Stadium hi a lian lo a, 196 runs hi a tam tawk lo. Battling line up nei ṭha Mumbai Indians hun a thleng a, Ishan Kishan (69) leh Rohit Sharma (38) te inkawpin bul an ṭan ṭha a, Suryakumar Yadav-a'n ball 19 lekah 52 runs siamin Hardik Pandya leh Tilak Varma ten thi loin 21 leh 16 runs an siam bawk.

Zanin dar 7:30 hian Punjab Kings leh Rajasthan Royals te an inkhel dawn a; April 14, Pathianniah Kolkata Knight Riders leh Lucknow Super Giants te tlai dar 3:30-ah an inkhel ang a, zan dar 7:30-ah Mumbai Indians leh Chennai Super Kings te an inkhel ve leh ang.