United tan Mainoo leh Kambwala

Manchester United-in zanin dar 10:00 hian Bournemouth an tlawh dawn a, rawlthar duhawm pahnih Kobbie Mainoo leh Willy Kambwala te an khel a nih chuan mipui mit fukna tur an ni leh thei ang. English club hian Mainoo leh Kambwala te hi contract thar an zawrh mek nia sawi a ni.

Erik Ten Hag-a hote hian season thara Champions League beiseina chhi nung turin Cherries lakah point thum an hlawhchhuah ngei a ṭul. Liverpool nen an inkhelh ṭuma goal mawi khungtu Mainoo hi Ten Hag-a hnuaiah hmun pawimawh a chang der tawh.

Kum 19 mi Kambwala erawhin defender inhliam tam zarah a theihna lantirna hun ṭha a nei a; Luke Shaw, Tyrell Malacia, Raphael Varane, Jonny Evans, Victor Lindelof leh Lisandro Martinez te inhliam vanga an la khelh theih dawn loh avangin Harry Maguire kiangah bul a ṭan leh ngei a rinawm.

Man United tan Cherries hi hneh chiang sa an ni lo. Nikum December 9 khan Bourneouth hian Dominic Solanke, Philip Billing leh Marcos Senesi te goal hmangin Old Trafford an luhchhuah. Chutihrualin Cherries hian Europe-a khelh an beisei lo a, Premier League khel zel tura an him tawh bawk avangin thapui chhuaha khelh erawh a har tawh thung ang.