Thlen china lungawi Inzaghi

Inter Milan manager Simone Inzaghi chuan tun season Serie A season an hman lai a thlirkir a, match 31 an khelh tawh china an chet danah a lungawi tawk hle tih a sawi chhuak a, hmabak an la neih pawh hlenchhuah ngei a tum.

Nerazzurri hian Italian football inelna sang berah hma an hruai mek, league match 31 an khelh aṭangin point 82 an hmu tawh, anmahni hnaih bertu AC Milan aiin khelh zat inangah point 14 zetin hma an hruai fal mek.

Inzaghi chuan, "Player ṭha leh Inter Milan tana inpe tak tak ka enkawl thei hi ka vannei hle, kei leh coaching staff tena kan duh leh beisei anga khel chhuaktu an nih avangin anni vanga tun dinhmun thleng hi kan ni.

"Inter hi tun hnaia khel ṭhat thut erawh kan ni lo, tun hnai season thum chhung vel chu hetiang hian kan khel tawh. He hmuna ka lo kal tirh kha chuan palina nih phak tumin kan bei a, tunah chuan champion tumin kan bei tawh thung.

"Tun season bik hi thlir ta ila, league match 31 aṭangin vawi 26 hnehna kan chang thei a ni a, kan ti ṭha hleah ka ngai. Kei leh player-te chauh pawh an ni lo, kan hnung lamah hian tawp chin nei loa min thlawp tlattu fans rinawm an awm bawk," a ti.

Inter Milan hian Pathianni zan dar 12:15 hian Cagliari an mikhual dawn a, chumi hnu an match lehpek tur chu AC Milan nen a ni ang - an hmabak pahnihah hian an chak chuan midang result ngaihchan tel ngai loin an champion thei dawn.