Mohammedan SC-in nomawi an chawi

I League 2023-24 chu khelh zawh a ni ta a, Inrinni zan khan Salt Lake Stadium-ah Mohammedan SC-in champion nomawi an chawi. Kum 133-a upa Mohammedan hian tualchhung inelna hrang hrangah nomawi chawi tawh mah se India ram pum huap inelna I League-a an vawi khat champion-na a ni.

Vivekananda Yuba Bharati Stadium, Salt Lake-ah mipui 25,000 chuang an pung khawm a, Mohammedan hian match tawp berah Delhi FC hmachhawnin 3-1 in hneh lo mah se an lawmna a tinep chuang lo. Russian coach Andrey Chernyshov-a'n match tawp berah hian player khel tlem zawkte a luhtir a, Delhi FC hian inkhelh ṭan dawnah I League champion-te hi guard of honour an pe.

Kum li liam ta khan Mohammedan hi I League Second Division-ah an champion a, tunah captain Zodingliana Tochhawng hoin I League champion nomawi an chawi. AIFF President Kalyan Chaubey chuan nomawi hi Mohammedan captain pathum Adinga, Samad Ali Mallick leh Joseph Adjei te hnenah a hlan.

Kolkata club-ah hian Adinga bakah Mizo player David Lalhlansanga, Lalremsanga Fanai, Samuel Lalmuanpuia, Vanlalzuidika leh Lalbiakhlua Jongte te an awm a, champion-na kawngah Mizo tlangvalten an thawh hlawk hle.

Tun season-ah Mizo tlangvalten sulhnu ṭha tak an hnutchhiah a, Aizawl FC forward Lalrinzuala chuan match 20-ah goal 15 khungin Indian zinga goal khung tam ber a ni. A pumpuia top scorer erawh Gokulam Kerala FC striker Alejandro Sanchez a ni a, match 22-ah goal 19 a khung a, a hnuaiah Rajasthan United forward Richardson Denzell awmin match 21-ah goal 16 a khung.

Assist ngah ber chu Inter Kashi forward Mario Barco-a ni a, match 20-ah assist vawi 12 a nei a, Indian zinga assist ngah ber chu Mizo tlangval Edmund Lalrindika niin match 24-ah inlan vekin Lunglei tlangval hian assist vawi riat a nei a ni.