United tan Champions League a hla!

Tun dinhmuna Manchester United leh season thara Champions League khelh chu, "Aw... kar a hla" tih hla hian a hrilhfiah ber mai a awm e - Inrinni zan khan league match-ah AFC Bournemouth chu 2-2 in an inhnehtawkpui hram a, season tharah Champions League an khel lo a nih pawhin mak ti suh.

Cherries hian Dominic Solanke leh Justin Kluivert hmangin vawi hnih ngawt hma an hruai a, mahse, United-in Bruno Fernandes-a goal hnih hmangin an chhanglet a, point khat an hlawh chhuak.

Red Devils hian top four china awm Aston Villa chu point 10-in an phak lo mek a, match ruk chiah khelh tur a awm tawh avangin Erik ten Hag leh a naute tan Europa League zawk beisei a fuh tawh mai thei.

Season chawhma lama champion sawi ri Tottenham Hotspur pawhin beisei an phak hleithei bik lo a, Newcastle United lakah 4-0 ngawta an tlawm avangin palina dinhmun hauhna chance an neih chu an hloh - Aston Villa nen point 60 ve ve an nei mek.

Fans kutah

Chhuanlam nei ṭhang Erik ten Hag-a'n chhuanlam a nei a, Dutch coach chuan, "Hma kan sawn leh sawn loh chu fans ho kutah a awm. Buaina tam tak kan nei a, kan level ang tawkin kan khel a ni. Kan theihna sang bera kan khelh vek chuan kan tiṭha thei viau ṭhin a, mahse, chutiang chuan minute 90 khelh a ngai," a ti.

Cherries-in inkhel bul an ṭan ṭha a, minute 16-naah Solanke chuan hmahruaina goal a khung nghal. Bournemouth-in inkhel thunun zui mah se, an chance hlah zozai an tuar a, Fernandes chuan minute 31-naah si phurh a sut.

United hlim chhung erawh rei lo tak a ni. Minute nga hnuah Kluivert chuan khung ve lehin Cherries ṭantute a lamtir a, 2-1 in chawlhlawk hman a ni.

Minute 60-naah United-in chance an nei ve leh a, Kobbie Mainoo-a shot chuan Adam Smith-a kut perin, penalty an hlawh. Bruno bawk lo pen chhuakin, goal-ah a chantir a, 2-2 in inkhel a tawp.

United an vannei

Liverpool laka bul ṭan, kum 19 mi Willy Kambwala-a'n fak a hlawh viau a, mahse, Cherries goal hnih khungah mawh a phur ve ve a, Kambwala fak turin fans leh media an hmanhmawh hret tih a lang.

Kambwala hi Ryan Christie laka penalty chawi thei dinhmunah a ding hman a, mahse, video assistant referee hmanga rei ngial en a nih hnuah a vannei hlauh. United tan Bruno-a'n goal hnih khung mah se, goalkeeper Andre Onana chu Red Devils player langsar ber tia chhal ngam a ni a, a chet ṭhat zarah an mualpho lutuk tur a zia deuh.

Onana hian Milos Kerkez khung ngei tura ngaih a dansak a, Luis Sinisterra-a'n uiawm takin chance a hlah a, Christie pawhin vawi hnih ngawt chance a nei - wingback Kerkez-a'n crossbar a tauh per te, Kluivert-a'n hnai taka a khung theih lohte chu an thlir let ang a, an ui vawng vawng ang.

Bournemouth manager Andoni Iraola chuan, "Kan chance neih kan chhawr lo a, hei aia result ṭha zawka inkhel khar thei kan ni," a ti a, hei hian inkhel dinhmun a sawifiah.

Spurs an mualpho

Magpies khelmualah top four-a inhlankai leh beisei chungin Spurs an leng a, goal li phur chungin an haw. Alexander Isak-a'n London club hi a thiam thil a lo 'show' khum a, goal hnih ṭha zet a khung.

Kum 24 mi Isak hian Premier League-ah a theihna a pholang zel a, tun season-ah league match 24 khela goal 17 khungin, assist vawi khat a nei tawh - Magpies-in team lian ni tura hma an panna kawngah Isak an chelh theih hi a pawimawh ang.

Newcastle tan hian Anthony Gordan leh Fabian Schar te chuan goal khat ve ve an khung bawk a, Gordon hian goal hnih a assist bawk - English player ṭhangduang hian tun season-ah league match 30 khela goal 10 khungin, assist vawi riat a nei.

Spurs tan Timo Werner chuan goal khungna chance vawi hnih nei ve mah se, a vanneih zan a ni lo a, tun season-a league goal 15 leh assist vawi kua nei tawh Son Heung-min a reh a, Magpies tlarhnungten Son dah ṭha turin hna an thawk ṭha hle.