Lawngtlai club 'MLS FC ' hun a thleng ta

MFA Cup vawi 22-naah inelna thlengtu Lawngtlai club MLS FC chuan final-ah Aizawl DFA First Division champion FC Bethlehem chu 2-1 a hnehin an champion. MFA Cup-a Lawngtlai club champion-na hmasa ber a nih avangin Lawngtlai tan hun chhinchiahtlak bik a ni.

Final hi Inrinni khan CYLA Ground-ah khelh a ni a, entu mipui an ṭhahnem hle. Tun inelnaa che ṭha ber MLS FC-in bul an ṭan ṭha a, B. Ramthianghlima hmangin minute 15-naah an khung bakah Raymond Lalhruaitluanga'n minute 86-naah chak nemnghehna goal a khung. Bethlehemin captain Joseph Lalṭhafela hmangin si phurh sut ṭhen mah se result a tidanglam pha lo.

Lawngtlai coach Vanlalpeka chuan, "Pathian vang chauh a ni e. Tournament kan khel tlem a, chu bakah tun ṭum hi kan vawi khat khelh hona a ni bawk. Push pass level kan la kalsan lo a, a bul ṭhut aṭangin kan la zir. Kan khingpuite kha a khelhah chuan kan ter pha lo ṭhin. Mahse, ka naute inpekna Pathianin mal min sawmsak a ni," tiin Vanglaini a hrilh.

Lawngtlai tan chauh ni lo Mizoram football tan pawha sulhnu ṭha tak hnutchhiahtu Peka hi Lawngtlai football tan a hlu takzet zet. Chutihrualin MPL11 khel tur zawnna Qualifier khelh a la ni dawn a, MLS FC leh FC Bethlehem te hi la inhmachhawn leh ngei tura ngaih a ni.

FC Bethlehem coach Lalhriatpuia Sailo chuan, "Tun ṭum MFA Cup-ah hian kan player tam zawk hna leh zirna avangin kan kim thei lo a, squad pawh a pan deuh. Final hial kan thlen avangin kan lawm a, MLS FC te ka lawmpui bawk. Lawngtlai mipui te, LDFA leh kan thlenna veng Chanmari te chungah thinlung takin lawmthu kan sawi," tiin Vanglaini a hrilh a, plyaer kim zawk nen MPL qualifying-a MLS FC hmachhawn a châk tawh thu a sawi tel bawk.