Goal khung thiam City

Premier League champion tum Manchester City-in Champions League quarterfinal vangin an buai eih lo tih an pholang a, Inrinni zan khan tlak hlau Luton Town chu 5-1 ngawtin an sawp.

City hian minute hnihnaah goal an khung nghal - Erling Haaland chuan Daiki Hashioka pet perin, goal-ah a lut a, first half-ah goal dang lut lo mah se, Mateo Kovacic, Haaland (penalty), Jeremy Doku leh Josko Gvardiol ten second half-ah goal khat ṭheuh khung ve lehin, Luton tana Ross Barkley-a goal khungin awmzia a nei phak lo.

Pep Guardiola enkawl City hian Thawhlehni zan khan Champions League quarterfinal first leg-ah Real Madrid chu 3-3 in an inhnehtawkpui a, Nilaini zan hian second leg khel turin Real hi an mikhual zui leh dawn.

Spanish coach Pep-a'n hei hi a rilruah dah chungin, chawlh hahdam a mamawh thu sawitu Rodri chu bench-ah a dah a, Bernardo Silva, Phil Foden leh Kyle Walker ten bul an ṭan lo bawk - mahse, an player hahdamtirte ngai loin, hahdam takin an chak thei.

City-in Premier League table chung ber an luah zui a, mahse, nizana inlan Liverpool leh Arsenal result a zirin an dinhmun hi he thuziak i chhiar meuh chuan a danglam leh tawh ang.