Isac-a'n Home Missions a chakpui

Reliance Foundation Development League national group stage-ah Mizoram aiawh Home Missions FC chuan nimin khan Delhi FC 2-1 a lehthalin match hmasa berah hnehna an chang. Delhi-a inkhelah mualneitu hian Gwgwmsar hmangin khung hmasa mah se Mizoram club-in Isac Zomuanpuia goal hnih hmangin an chhanglet.

Inkhelhna hmun hi phaitual hnim a ni a, mam ṭha tawk lo mah se coach Rochhingpuia kaihhruai Home Missions FC-in inkhel a thunun. Mizo club hian 57% ball an chang thei a, chutihrualin goal khung hmasa zawk erawh Delhi an ni. Minute 58-naah dinglam aṭanga cross ball lut chu Gwgwmsar-a'n a tauh goal.

Home Missions hi chak lo thei dinhmunah an ding a, chutihrualin hun tawp dawn hnaiah pawh an beidawng lo. Minute 82-naah Lalpekhlua'n (Pake-a) penalty hlawhchhuah chu Isac-a'n a goal-ah a chantir a, Sihphir tlangval hi a che ṭha chhunzawm zel. Injury time-ah Thanglalven Gangte hnen aṭanga a ball hmuh chu, Isac hian mawi zetin goal kilah mual vei lam aṭangin a hlai lut.

Inkhel dangah East Bengal-in NorthEast United 1-0 in an hneh. Home Missions hi round hnihnaah an awl dawn a, April 20, Inrinni chawhma dar 11:00-ah East Bengal nen an inkhel leh ang.