Chanmarians an champion

Cricket Association of Mizoram (CAM) hnuaia inelna lian - Mahuma Memorial 1st Division Screening Tournament chu Inrinni khan a hmawr bawk a ni a, inkhel hmuhnawmah Chanmarians chuan Kulikawn chu wicket sarih a hnehin an champion.

CAM hnuaia 1st Division-ah hian club pariat an awm a, league round lamah an inkhel kual hmasa vek; chumi hnuah point hmu sang pahnih ten final hi an khel a, a hniam lama awm pahnihte chu second division lamah an tlahniam thung.

A sang pali - Chanmarians, Kulikawn, Ramhlun Venglai leh Ṭhuampui te chu Mizoram Cricket League khel turin an tling nghal a, a hniam pahnih Chhinga Veng leh Bawngkawn South te erawh 1st division aṭangin an tla a ni.

Tualchhung cricket inelna dang - second division tana buatsaih Khaled Memorial Tournament pawh khelh zawh niin, nomawi inchuhna inkhelah Pacers chuan Luangmual chu run 74 a hnehin an champion ve bawk.