Spanish club liante an chak vek
Kartawp La Liga inkhelah Real Madrid, Barcelona leh Atletico Madrid te an chak vek a, Spanish top flight league-ah team dinhmun inthlak danglam langsar a awm lo.
Inrinni zan inkhel ngaihven hlawhah Atletico Madrid chuan 3-1 in Girona an hneh a, champion beisei ngam tawh lo mah se Champions League khelh beiseina erawh a nung ve zel.
La Liga hmahruaitu Real Madrid-in an hmahruaina chhawm nung zel turin Real Mallorca chu 1-0 in an hneh a, Cadiz lakah 1-0 in Barcelona an chak ve bawk.
Atletico beiseina
Girona-in beisei phak bakin season an hmang ṭha a, champion hial an sawi ri hman. Mahse, tun hnaiah club tenau zia a lang a, beisei ang result an nei hleithei lo - Inrinni zanah pawh Atletico an ngam lo.
Girona tan Artem Dovbyk chuan minute lina lekah goal hmahruai khung mah se, Girona defender Miguel Gutiérrez handball vangin Atletico-in penalty an hmu a, Antoine Griezmann chuan goal-ah a chantir.
First half hun pek belhah Ángel Correa chuan Atletico hmahruaina goal a khung zui a, minute 50-naah Griezmann chuan goal thumna a khung - tun season inelna hrang hrangah goal 21 khunga assist vawi riat neiin, Girona lakah a team a chakpui a, palinaah an dinhmun an sawhnghet.
Real an chak
Mallorca khelmualah Real tan Aurelien Tchouameni chuan inkhela goal awmchhun a khung a, table chung bera an dinhmun an sawhnghet zel - match sarih chiah khelh tur awm tawhah pahnihna Barca aiin point riatin an sang.
Thawhlehni zan khan Champions League quarterfinal first leg-ah Real hian Manchester City chu 3-3 in an inhnehtawkpui a, Nilaini zan hian Etihad Stadium-ah second leg khel turin an leng leh dawn.
Real boss Carlo Ancelotti chuan City nena an inkhel tur thlirlawkin Dani Carvajal, Eduardo Camavinga, Toni Kroos leh Vinicius Junior te chu bench-ah a dah vek a, Jude Bellingham chu minute 64 thleng khelhtir a ni.
Beisei a bo lo
Atletico leh Real chak thu hre sain Barcelona an inlan a, Cadiz lakah 1-0 in an chak. Atletico aṭanga loan-a an hawh Joao Felix chuan overhead kick hmangin mawi zetin a khung a, goal dang a lut tawh lo.
Barca manager Xavi-a'n Thawhlehni zanah Champions League quarterfinal second leg khel turin Paris St-Germain an mikhual dawn tih a hria a, first leg-a 3-2 a an hneh tawh team nena an inkhel tur thlirin, PSG nena an intawnna inkhel aṭangin player pariat ngawt a thlak danglam.
Catalan club tan kum 17 mi centre back Pau Cubarsi, kum 17 tho right back Hector Fort leh kum 19 mi forward Vitor Roque ten inkhel bul an ṭan a, Barca hian chak chance pawh an nei. Mahse, goal hmaah an vanduai a, Fermin Lopez-a khung ngei tur nia lang Cadiz centre back Victor Chust-a'n goalline-a a lo dan hmante chu pui tak a ni.