NorthEast-in Odisha an sawp

Indian Super League inkhelah Inrinni zan khan NorthEast United chuan 3-0 in Odisha an sawp a, Parthib Gogoi, Nestor Albiach leh Phalguni Singh ten goal khat ṭheuh khungin, goal dang a lut tawh lo.

Odisha-in playoff an khel dawn chiang tawh a, hei vang hian coach Sergio Lobera chuan playoff knockout thlir chungin player a siksawi a, Jerry Lalrinzuala, K. Lalṭhathanga leh Isak Vanlalruatfela ten bul an ṭan lo - Lalthuammawia'n tun season ISL-a a vawi khat nan goal a veng a, Jerry Mawihmingthanga'n bul a ṭan bawk.

Zirtawpni zan khan Kerala Blasters chuan 3-1 in Hyderabad FC an hneh a, Freddy Lallawmawma bul ṭan zanah Blasters tan Mohammed Aimen, Daisuke Sakai leh Nihal Sudheesh ten goal khung vekin, Hyderabad tana Joao Victor goal khungin awmzia a nei phak lo. Kerala Blasters hian playoff-ah semifinal luh inchuhin Odisha an hmachhawn ang.

Hyderabad tan Mark Zothanpuia leh Ramhlunchhunga ten bul an ṭan a, Lalchhanhima Sailo leh Jeremy Zohminghlua te chu bench aṭanga lutin, Joseph Lalrinawma Sailo chu hun tawp dawnah a lut bawk - ISL-a match a khelh hmasak ber a ni.

Zanin dar 7:30-ah Mohun Bagan leh Mumbai City inkhelin, he inkhela chak zawk hian ISL league winner shield an chawi ang - Mumbai tan draw ringawt pawh a tawk ang.