Bayern Munich an chak

Inrinni zan Bundesliga inkhelah Bayern Munich chuan an mikhual Cologne chu 2-0 in an hneh a, tun kara Arsenal nen Champions League quarterfinal second leg an khelh tur atan an inbuatsaih ṭha hle.

Bayern Munich hi chak lo ni se la chuan Bayer Leverkusen an champion nghal thei tawh, nizan khan Xabi Alonso enkawl Leverkusen an inlan a, an chak a nih chuan a vawi khat nan German champion an ni dawn chiang tho a ni.

Bavarians hian a tir lamah goal khung an harsat, striker ṭha Harry Kane leh Mathys Tel te chuan first half chhungin goal ban an tih per. Second half-ah erawh Raphael Guerreiro leh Thomas Muller ten goal an khung thung.

Bayern Munich hian 2011-12 hnu lamah league nomawi an chawi ngar ngar, a zawnin season 11 an champion thei hial. Kuminah erawh Thomas Tuchel-a naute hian beisei an phak lo - England captain Kane-a'n league match 29 aṭangin goal 32 khung thei mah se champion nan a tawk zo lo a ni.

Cologne an hneh zan hian Kingsley Coman chu ke ding lam hliam vanga lak chhuah a ngai a, Arsenal a hmachhawn thei dawn em tih a chiang lo. UCL khel tura khek khal Jamal Musiala chuan Coman hi a rawn thlak a, ani pawh hahchawl hman loin a inkhelh a ngaih phah.

Bayern Munich manager Tuchel chuan, "Kingsley Coman inhliam kha a pawi ka ti, player thawkrim leh theihtawp chhuah mi a ni a, kan team tana player pawimawh tak an hliam hi chuan a pawi ṭhin takzet.

"Serge Gnabry a hliam mek a, ani bakah hian Leroy Sane chu kar laihawl inkhel atan a dinhmun a chiang lo bawk," tiin hliam vanga buai thei an nih thu a sawi. Bundesliga title an hum theih loh avangin UCL champion an duhna a sang zual ngei ang.

Kar tawp inkhelah hian Serge Gnabry leh Leroy Sane te pawh hliam vangin an inlan lo, an hmatawngte hi an dam hman a nih loh chuan North London club an mikhual hunah an ṭhat dan berin an inlan thei dawn lo, chutihrualin UCL ngaih pawimawh vanga inkhek pawh a ni thei bawk.