Semifinal-ah Djokovic a tla

Novak Djokovic tan kumin chu season ṭha a ni thei rih lo - Monte Carlo Masters semifinal-ah Serbian star hian Casper Ruud a hneh lo a, final lut phak loin a zinkawng a tawp.

World number 1 Djokovic hi Norway tlangval lakah hian 6-4, 1-6, 6-4 in a chak lo, tennis season kal laiah nomawi a la chawi lo chhunzawm zel dawn tihna a ni a, insiamṭhat a mamawh ta hle.

January thla khan Australian Open-ah a champion lo a, a hnuah Indian Wells khelin player langsar lo lakah a tlawm - Miami Open aṭanga inhnukdawkin tunah Monte Carlo lamah a inlan, a beisei ang result erawh a nei thei rih lo a ni.

Kum 36 mi Djokovic chuan, "Tun hnai season 15 ka hman tawhte nena khaikhin chuan kumin hi a bul ka ṭan fuh lo takzet. Mi te min beisei ang ka phak loh avangin a hrehawm pawh ka ti hle, mahse chak lohna karah pawh hian hlawkna hrang hrang chu ka tawng ve tho," a ti.

Grand Slam vawi 24 champion tawh hian clay court season hman chhunzawm zel a tum a, thla thar May chawhnu lama khelh tur French Open-ah pawh inlan ngei a tum, chumi tur chuan a inbuatsaih zui ang.

Monte Carlo Masters semifinal dangah Stefanos Tsitsipas chuan a khingpui Jannik Sinner chu 6-4, 3-6, 6-4 in a hneh. Australian Open champion lai Sinner hnehtu Tsitsipas leh Ruud ten nizan khan final an khel zui a, result erawh kan hre hman ta lo a ni.