Barcelona-ah Nadal a lo kir dawn

Hun rei tak chhung a chawlh hnuah Rafael Nadal chuan tennis a khel leh thei dawn ta niin a lang. Tun kar chhunga khelh tur Barcelona Open-ah a inlan dawn, a match hmasa berah Flavio Cobolli nen an inhmachhawn ang.

Grand Slam vawi 22 champion tawh Nadal hi season hmasa Australian Open khelh lai khan a inhliam, inkhel loa a awm char char hnuah kumin Janaury thla khan match a khel ve leh zauh a, a hnuah a la inkhel leh lo.

Nadal hian tournament khelh chu a tum ṭhin, a hming pawh pe lut ṭhin mah se a taksa in a tlin ngang loh avangin a inhnukdawk leh mai ṭhin. A tan chuan clay court season hman theih hram hi a châkawm zual ngei ang.

Kumin June thla a kum 38 tling tawh tur a ni a, tennis khawvelah chuan a hun hnuhnung a ni tawh. Season hmasa khan kuminah hian chawlh a rilruk thu a lo sawi tawh, atan tournament hnuhnung ber a ni chho zel thei tawh a ni.

May thla chawhnu lam hian French Open an khel leh dawn, vawi 14 champion tawh Nadal hi a inlan thei a nih chuan tennis ngainatute tan duhthusam a ni ang a, amah thlahna tia sawi theih pawh a ni ang.