Rajasthan leh Delhi an chak

IPL-ah Rajasthan Royals-in Inrinni zan khan Punjab Kings wicket thumin an hneh a, Delhi Capitals-in Lucknow Super Giants chu wicket rukin an hneh ve bawk. Zanin dar 7:30 hian Royal Challengers Bengaluru leh Sunrisers Hyderabad te an inkhel ve leh ang.

Ekana Sports City, Lucknow-ah Super Giants tan opener KL Rahul-a'n 39 runs vaw chhuak mah se middle order an che ṭha lo. Ayush Badoni-a'n thi loa 55 runs a siam zarah 167/7 runs an siam a, target sang a la ni lo.

Delhi tan Prithvi Shaw (33), Jake Fraser-McGurk (55) leh Rishabt Pant (41) te an che ṭha a, over 18.1-ah 170/4 runs siamin hnehna an chang. Delhi chak mah se match ruk khelh tawhah vawi hnih chakna chauh a ni a, point li chauh an la hmuin team 10 zingah pakuana an ni.

Mohali Punjab-ah bowler ho an che ṭha. Kings tan Ahsutosh Sharma (31), Jitesh Sharma (29) leh Liam Livingstone (29) ten run siam chhe lo mah se over 20-ah 147/8 runs chauh an siam. Royals tan awlsam taka umphak theih niin lang mah se ball khat chauh dah bangin over 19.5-ah 152/7 runs siamin hnehna an chang chauh.

Shimron Hetmyer-a'n Rajasthan a chhan chhuak a, over tawp berah 10 runs siam a la ngai. Over tawp berah Kings tan Trent Boult-a'n a vawm a, ball hmasa pahnihah run a pe lo. Mahse, Hetymer-a'n six runs a vaw chhuak a, hemi zawh hian run hnih siam lehin ball nganaah chak nan six runs a vaw leh bawk.