Allegri a lungawi lo

Juventus chu an mikhualna ramah Torino nen goal awm lo 0-0 in an inhnehtawk a, mikhual Juve coach Massimiliano Allegri chuan point thum hlawh chhuah beisei chunga goal an khung thei lo chu pawi a tih thu a sawi.

Old Lady hian Serie A match 32 aṭangin point 63 an hmu a, match khata an khel tam zawk chungin Inter Milan an phak lohna chu point 19 tehmeuh a ni - Italian club lian pahnih inkara point awm atan chuan a tam hle.

Allegri chuan, "First half kan khel ṭha a, chutiang bawkin second half-ah pawh goal khung theihna remchang kan insiam hnem hle. Khatiang chunga goal kan khung thei miah lo kha a pawi, kan khelh danah chuan chak phu zawk kan ni.

"Tun season chhungin khelh hmabak league match paruk kan la nei, hetah hian thil tam tak a la thleng thei. Match tinah chak vek kan tum tawh tur a ni ang," a ti. Season thara Champions League khel thei turin an dinhmun a ṭha rih a, hei ringawt erawh lungawina tur a ni lo ang.