Zarkawt BCA-in MSL an khel zel dawn
Mizoram chhunga bas-ket-ball inelna ngaihhlut ber Mizoram Super League Season 3 khel tur a hriat kim ta a, Zarkawt BCA chu team parukna an ni.
Hawla Indoor Stadium, Re-public Vengthlangah MSL1 finalist BCA hian Relegation Playoff-ah Division I pahnihna Republic VR4 chu 2-1 in an hneh a, Zirtawpni zan game 3-ah 82-69 in an chak.
MSL3-a team paruk awm turte chu Khatla TBL, Tuikual South, Mission Veng Vikings, Zarkawt Serpents, Division I champion Hollow BBSP leh Zarkawt BCA te an ni ang.
Game 3 chu
Zarkawt BCA-in game 2-ah Aravind Annadurai an ngam lo a, game 3-ah erawh an tihsual lai insiamṭhain Mizo player hmangin hnehna an chang.
MSL2-a Mizo hlanga khel awm-chhun Zarkawt BCA tan Albert Lalramchuana chuan a hlah thei lo a ni ber a, Jackson Lalrintluanga, Mi-chael F. Lalawmpuia leh David Lalruatfela ten an thlawp ṭha. Player naupang Matthew Remtluanga Sailo leh Lalremsanga te pawh pressure sang tak inkhelah an talbuai lo.
Republic VR4 lamin Ara-vind Annadurai chhawr tum ngial mah se BCA lamin India team center hi an veng uluk a, dan theih loh chang nei mah se chakna tham a ni tawh lo. Barundi baller Brian-a'n third quarter-ah 3-point leh point hnih hlu tak a nei nachungin VR4 an tho chhuak thei lo a, hun a tawp meuh chuan team pum-puia khel ṭha zawk BCA an chak.
Sawi zui hlawh
Second quarter tawp dawn hnaiha point dinhmun chu 34-34 a ni a, hun tawp rualin Jackson Lalrintluanga'n foul draw-in freethrow a hlawh a, second khat pawh awm tling tawh loin 0.7 second chiah a awm tawh.
Chawnpui tlangval hian freethrow pahnih hi lut lo mah se 0.7 second hi a la ral lo a, BCA guard Michael-a'n point hnih a khung. Scoreboard a chian loh avangin 0.7 second hi che sawn lo a, official lamin BCA basket hi an pawm sak.
Republic Veng mipui inkhelh ṭantirh lama au thiam tak an lungawi lo ṭan a, hun tawp lamah phei chuan an mawi lo takin court chhungah tui bottle an vawm lut. Official thutlukna eng pawh ni se VR4 ṭantute chet dan a dik lo a, Zarkawt BCA-in court an chhuahsan.
Buaina vangin inkhel khaih-lak zeuh mah se tluang takin inkhel a zo a, MSL hlawhtling taka buatsaihtu MBBA-in Relegation Battle an buatsaih uluk tawk loh vangin a tawp dan erawh a fel famkim lo.
Eng nge an sawi?
Zarkawt BCA assistant coach Lalruatfela chuan, "Game 2 leh game 3 ni zawna khelh a nih avangin tlai dar 5:30-ah kan practice a, Aravind Annadurai ven dan kan zir a, kan hlawhtlingah kan ngai. Player-te inpekna vangin MSL kan khel leh thei tur hi a lawmawm a, mipui lam erawh inzirna tur a la tamin ka hria. Basketball chhungkua hi kan inzah tawh ṭhin a, game inpumkhatna kan kalpui zel a ṭul a, game zahawmna kan humhim hi a ṭul a ni," tiin Vanglaini palai a hrilh.
Republic VR4 coach Robert Laldinpuia chuan, "Halftime hma chiaha 0.7 second rei lutuk ang kha kan la hre ngai lo a, world record kan siamin kan hria a, inkhel thlak danglamtuah kan ngai bawk. BCA chhuak tau kan lo nghak kha kan puitling hle ah kan in ngai, an chhuah tauh avanga hremna awm lo erawh kan lungawi lo," tiin Vanglaini palai a hrilh.
VR4 coach Robert sawi zelin, "Referee thutlukna dik lo tam lutuk chu kan chak loh chhanah kan ngai a, min ṭantu Republic Veng mipui chungah erawh kan lungawi a, min ṭawiawmnaah kan lawm takzet," a ti.