Hammers chak zanah Martinez duh lohna

West Ham-in season thara Europe-a inlan beisei chhunzawm ve zelin Inrinni zan khan West Brom chu 3-0 in an hneh a, Everton-in 2-1 in Bournemouth hneh ve bawk mah se manager Roberto Martinez duh-lohna thawm fan-ten an au pui nasa hle.

Baggies khelmualah inkhelah Hammers tan Cheikhou Kouyate-a'n goal hmahruai a khung hnuah Mark Noble chuan goal hnihin a chhunzawm a, hun tawp thlenga goal dang a luh tawh loh avangin West Ham-in 3-0 in hnehna an chang.

Inrinni zan inkhel dangah Everton chuan Tom Cleverley hmangin minute 7-na lekah hma-hruai mah se Marc Pugh chuan mikhual team tan minute hnih hnu lawkah an si phurh a sut lehnghal.

Everton khelmualah fan-te'n manager Roberto Martinez duh lohna thu an tlangaupui a, chung lamah thlawhtheihna hmang-in 'Roberto i kal a hun tawh e' tih banner chu thlawh kual pui a ni bawk.

Mahse, minute 64-naah Leighton Baines chuan Spanish manager phurrit chhawk zangkhai turin goal a khung a, Merseyside club-in Hill-s-borough chhiatna avanga thi tate thiam channa an lawmpui zanah a team tan point thum a hlawh chhuah sak.