Barca, Atletico & Real an inum zel

Inrinni zan La Liga inkhelah Barcelona chuan an hmahruaina chhunzawm turin Real Betis chu khualmualah 2-0 in an hneh a, Luis Suarez chuan tun season-a a goal 54-na a khung!

La Liga inkhel dangah Atle-tico Madrid chuan 1-0 in Rayo Vallecano an hneh a, Real Madrid chuan 1-0 vekin Real Sociedad an hneh ve bawk - Barca inlan hmain team pahnih hian table chunglam luah ve zawk mah se Barca an rawn chak chhunzawm ve nghal avangin table chung berah Barcelona an awm zel.

Suarez bawk

Barcelona-in an league match hnuhnung pahnihah goal 14 an khung a, Real Betis an hmachhawnna inkhelah erawh goal an khung lawk lo.

Betis defender Heiko Wes-ter-mann chu minute 35-naah hnawhchhuah a ni a, player kim loa Betis an khelh hnuah Barcelona goal nawr a na sawt.

Minute 50-naah Ivan Raki-tic-a'n goal a khung hnuah minute 81-naah Suarez chuan goal khat dang a khung zui ve leh a, player kim loa khel Betis tan Barca laka an si phurh sut zawh theih a ni lo.

Suarez-a'n tun season La Liga-ah goal khung hnem ber dinhmun luahin vawi 33 inlanah goal 35 a khung tawh a, inelna hrang hrangah vawi 50 inlanin goal 54 a khung tawh.

Barcelona coach Luis En-rique chuan, "Team pathum-in champion kan la tum vek a, Atletico leh Real hi team ṭha tak an nih avangin an tawlh thluk ka ring lo. Engkim hi kan kuta innghat a ni," tiin champion chu anmahni kuta awm a nih thu a sawi.

Real tan Bale

Inrinni zanah Real Madrid-in an player chhuanvawr pahnih Cristiano Ronaldo leh Karim Benzema chu hliam vangin chhawr thei lo mah se Gareth Bale-a'n innghahna tlak a nihzia lantirin Real Sociedad lakah goal awmchhun a khung a, Real tan point thum hlu tak a hlawh chhuak.

Real Madrid tan league match 10 chhung a zawna chak result an hlawh chhuahna a ni a, Champions League final lut thei dinhmuna ding mek club hian league nomawi chawi tur pawhin beiseina an la neih chhunzawm ve zel.

Real Madrid coach Zinedine Zidane chuan, "Bale hi hliam vangin a buai reng a, mahse a in fit ṭhat tak tak chuan eng ang chiaha thiam nge a nih tih hi khelmual chhungah hmuh theihin a awm reng a ni. Ka naute khelh danah ka lawm a, point thum hlu tak kan hlawh chhuak a ni," a ti.

Atletico an chak

Atletico Madrid chuan sub-stitute Antoine Griezmann goal khung chhawr ṭangkaiin Rayo Vallecano chu 1-0 in an hneh a, hmahruaitu Barcelona nen an point dinhmun a inang zel.

Antoine Griezmann-a tan tun season-a goal 31 a khungna chiah a ni a, France international ruala khelmual chhunga tlan lut Fernando Torres chuan goal khungna hun ṭha nei mah se Juan Carlos chuan ṭha takin a dan sak.

Madrid khaw club hian match li chhung chu a zawnin 1-0 in hnehna an chang ta a, Champions League final lut tura dinhmun
ṭha taka ding mek club hian tun season La Liga-ah match 23 chhung chu goal an chhuah ta lo.