PSG-in record siam dawn hnai

Paris St-Germain chuan French Ligue 1 champion nomawi chawi tawh mah se an inthlahdah phah lo a, Zirtawpni zan khan an mikhual Rennes chu 4-0 in an sawp.

Kum 2013-14 khan PSG hian league-ah point 89 hmuin season khat chhunga French Ligue 1-a point hmu tam ber an lo ni tawh a, Rennes laka hnehna an chan hian an record lo siam tawh chu an nihrual leh chiah.

Parc des Princes-a inkhelah Laurent Blanc-a nauten first half-ah goal an khung lo a, second half-ah erawh Maxwell-a'n goal hmahruai khungin Zlatan Ibrahimovic chuan goal hnih khung belh zui zatin Edinson Cavani-a'n an goal lina a khung ve bawk.

Tun season-ah Ajaccio (away), Bordeaux (away) leh Nantes (home) te an la hmachhawn dawn a, record thar saim theihna hun an nei ang. Tun dinhmunah pahnihna Lyon aiin point 30 zetin an sang fal tawh a ni.

PSG hian treble cham-pion nih theihna hun an la nei a, league title an lak tawh bakah Coupe de la Ligue nomawi an chawi tawh a; Coupe de France final-ah Marseille nen an la inhmachhawn leh dawn bawk.