Bayern chelhtu Monchengladbach

A zawna Bundesliga nomawi vawi li chawi turin Bayern Munich tan vawi khat chak bak a ngai tawh lo. Inrinni zan khan league nomawi chawi thei dinhmunah ding mah se Borussia Monchengladbach nen 1-1 a an inhnehtawk avangin Pep Guardiola nauten champion turin match khat dang an nghah leh a ngai dawn.

Allianz Arena-ah Bayern hian league-a vawi 26 champion hmel an hmu hman teuh hle a, inkhel ṭan aṭanga minute rukna lekah Thomas Muller chuan a tauh goal. German international Muller-a'n tun season-a a league goal 20-na a khung hmang hian Bayern hi chak tlang tura ngaih ni mah se minute 72-naah Andre Hahn chuan an si phurh a sut.

Spanish manager Guardiola-a'n Champions League semifinal first leg-a Atletico Madrid hneh lotu zinga ṭangin player pariat ngawt a siksawi a, Thawhleh zana second leg an khelh tur hre rengin Robert Lewandowski, Philipp Lahm, Arturo Vidal leh keeper Manuel Neuer te chu bench-ah a hahchawlhtir. Barcelona manager hlui hian league champion nih nghal ai chuan Champions League final luh theih dan kawng a ngaihtuah tih a chiang.

Bayern hian kartawpah Gladbach an hmachhawn leh ang a, May 21 khian Borussia Dortmund nen German Cup final an khel bawk ang.

Season thara Manchester City manager ni tawh tur Guardiola chuan, "Hnehna chan ngei kan duh a, kan team leh fans tan pawh chu chu a pawimawh. Mahse, kan tum angin thil a kaltluang lo a, vawi khat chak emaw draw emaw kan la mamawh a, kan dinhmun a chhe hran lo. Tunah chuan Atletico nena kan inkhelh tur kan ngaihtuah a hun leh tawh a, Champions League final lut tur chuan tun ṭuma kan khelh aia ṭha zawka kan khelh a ṭul," tiin a sawi.

Dortmund chak chiang

Champion beisei ngam tawh chiah lo mah se Borussia Dortmund an la beidawng duh bik lo a, Inrinni zan khan an mikhual Wolfsburg lakah ṭhat chhuah duh loin 5-1 in an sawp.

Signal Iduna Park-ah Tho-mas Tuchel-a naute hian Shinji Kagawa, Adrian Ramos leh Mar-co Reus te goal khat ṭheuh bakah Pierre-Emerick Aubameyang goal hnih hmangin Wolfsburg lakah an chungnunzia an lantir a, mikhual goal neih chhun hi hun tawp dawna Andre Schurrle khung a ni.

Dortmund hian tun season-ah an club chanchina an point hmuh ṭhat ber ṭum an tawng mek a, match 32 khelh tawh aṭanga point 77 hmuin Bundesliga hmahruaitu Bayern nen an inthlauhna chu point nga a ni. Bundesliga season chawhnu lamah Dortmund chiah hi tlawm loa la kaltluang thei awmchhun an ni nghe nghe.