Gujarat Lions-in hma an hruai zel

Indian Premier League khelh mekah Gujarat Lions-in dang theitu an la tawng meuh lo - Zirtawpni zan khan Rising Pune Supergiants chu wicket sarihin an hneh a, IPL table chung berah an awm chhunzawm zel.

Pune tan run 69 siamtu Faf du Plessis khel ṭha viau mah se a ṭhianten an khelh ṭhat tawk loh avangin over 20-ah run 163 chiah an tlin a, mi panga an hloh.

Gujarat Lions-in over 18 chhung leka an target umphain run 164 an siam a, mi pathum an hloh. Gujarat tan Aaron Finch (50 runs) leh Brendon McCullum (49 runs)-te an che ṭha a, table chung bera Lions awm chhunzawm theihna chhan an ni.

Inrinni zan IPL-ah inkhel pahnih a awm a, inkhel hmasa zawkah Delhi Daredevils chuan run 27-in Kolkata Knight Riders an hneh a, inkhel hnuhnung zawkah Sunrisers Hyderabad chuan run 15-in Royal Challengers Bangalore an hneh bawk.

Feroz Shah Kotla, Delhi-a inkhelah bat hmasa zawk Delhi chuan over 20 chhungin run 186 an siam a, mi pariat an hloh. Delhi tan Karun Nair (68 runs) leh Sam Billings (54 runs)-te an khel ṭha takzet.

Kolkata-in run 72 siamtu Robin Uthappa hmangin inkhel bul ṭan ṭha viau mah se Indian batsman a out hnuah batsman dang che thei an awm lo a, over 18.3-ah Kolkata batsman-te out vekin run 159 chiah an tlin thei a ni.

Delhi tan fast bowler Zaheer Khan-a'n a la tar lo tih tilangin over 3.3-a vawmah run 21 chiah pein wicket thum a la a, Kolkata batsman-te tan mangchhia tih loh rual a ni lo.

Inrinni zan inkhel hnu-hnung zawkah Royal Chal-lengers Bangalore tan Virat Kohli chet ṭhat zan a ni lo a, Indian batsman lansarh loh zanah Bangalore an langsar thei lo.

Rajiv Gandhi International Stadium, Hyderabad-a inkhelah bat hmasa zawk Sunrisers-in over 20 chhungin run 194 an siam a, mi panga an hloh. Captain David Warner-a'n hmuhnawm khawpa khelin ball 50 lek a hmachhawnah run 92 tehmeuh a vaw chhuak a, run 50 siamtu Kane Williamson leh run 31 siama a tawp thleng dam Moises Henriques-ten an pui ṭha takzet bawk.

Royal Challengers Bangalore-in Lokesh Rahul (51 runs) leh AB de Villiers (47 runs) hmangin an target umphak tum viau mah se run 14 siamtu captain Virat Kohli chet ṭhat zan a nih loh avangin an target an umpha lo a, over 20-a run 179 siama mi paruk hlohin a chak lo zawkah an ṭang ta a ni.

Zanin IPL-ah inkhel pakhat chauh a awm dawn a, Royal Challlengers Banga-lore leh Kolkata Knight Riders-te chu zan dar 8:00-ah an in hmachhawn ang.