Federation Cup : Aizawl FC 2 - 1 Bengaluru FC. I League champion ngamtu MPL champion

Kan khawtualah a vawi khat nan Federation Cup chu khelh a ni ta a, Mizoram Premier League champion Aizawl FC-in I League champion thar Bengaluru FC chu 2-1 in an hneh.

MPL champion hian Rajiv Gandhi Stadium Mualpuiah hian nikum I League champion Mohun Bagan an lo hneh tawh a, Mizoramah I League champion nomawi kawltu pahnih an rawn zin tawh a, an chak lo ve ve.

Inrinni tlaiah Aizawl FC hian Bengaluru FC hi hneh mah se semifinal an lut tihna erawh a la ni lo. Thawhlehni hian I League champion hian Mizoram club an lo mikhual ve leh ang a, inkhel pahnih belhkhawma chak zawk chu a sang paliah an inhlangkai ang.

Federation Cup-ah away goal rule hman a ni a, Blues hian 1-0 leka hnehna an chan pawhin semifinal an lut dawn. 1-0 hian Ashley Westwood-a hoten Aizawl FC hi I League-ah vawi hnih ngawt an lo hneh tawh a, inelna a la tawp lo.

Saturday-ah Sunday

Minute 15-na lekah Benga-luru FC-in I League best mid-fiel-der Eugeneson Lyngdoh hmangin goal an khung - goal khung tur hian keeper Amrinder singh aṭanga ball in pass ṭanin vawi riat an in pass hnuah an pet goal a, Aizawl FC player-te'n ball an khawih lo. He goal hi Aizawl FC players leh fans lamin offside-a ngaiin an sawisel nasa hle.

Amaherawhchu Jahar Das-a hote an tlawm mai lo a, minute 38-naah Ricky Lallawmawma ball vawrh luh chu Blues defender Osano Curtis chuan la perin Aizawl FC striker Alfred Kemah Jaryan-a'n laklawh awm miah loin a hlap nghal pawp a, I League best keeper tan dan rual a ni lo.

1-1 in chawlh lawk an hmang a, second half-ah goal khat chiah a luh belh. Minute 90-naah substitute R. Malsawmtluanga ball vawrh luh chu Alfred-a'n la lutin Liberian striker hian Blues wing back Lalchhuanmawia Fanai a bum hnuah Joel Sunday a pe a, Nige-rian striker hian chiang takin chakna goal a khung.

Champion thlipui

Bengaluru FC-in inkhel an thunun nghal a, Aizawl FC an him hram hram. Minute thumna lekah Eugeneson-a corner pet aṭanga ball kal chu Sunil Chettri-a'n goal zawnah pet mah se goal bana ding Chhawnkima'n a lo dang hlauh. Hemi hnu lawk hian Eugeneson-a free-kick pet chu Udanta-a'n ṭha takin a tauh a, goal ngei tura ngaih chu Soram Porei-a'n ṭha dangin a dang. A per chu North Korean striker Kim-a'n pet nghal mah se goalline aṭangin Emma-a'n a lo dang leh bawk.

Blues an hlauhawm zel a, Eugeneson-a corner pet chu John Johnson-a'n goal ban a pet per a, he mi hnu lawk hian I League best midfielder Eugeneson-a'n a pet goal.

Second half-ah Bengaluru tan substitute Daniel Lalhlim-puia'n Aizawl FC defender tihsual zarah chance ṭha a nei a, a muan deuh vang leh Emma tackle
ṭhat vangin MPL champion an him hram. Mikhual team tan Udanta Singh a hmuhnawm a, Manipur winger tlan chak leh Daniel ten penalty an beisei ve ve a, referee-in a pe tlat lo.

Aizawl FC nge nge

I League aṭanga relegate Aizawl FC-in champion team lakah Mizo zia an chhuah a, inkhelh ṭantirh lamah an talbuai tih loh chu an che ṭha zawk.

Aizawl FC tlarhma Joel Sunday, Alfred, Brandon VL Remdika leh Albert Zohmingmawia ten Blues tlarhnung an tibuai ve reng a, David Lalrinmuana leh Yuta te'n midfield an khaikhawm
ṭha bawk. Tlarhnung lam an che ṭha a, wing back Ricky chuan ama chan lam a hneh bakah goal nawr thlengin a pui ṭha hle.

MPL champion chak chungin an vanduai - first half-ah Joel Sunday-a'n goal ban a pet per a, second half-ah Alfred-a'n Rikcy ball vawrh hmang ṭangkaia Blues keeper Amrinder a tlan pelh hnuah a pet goal lo. Alfred-a goal thun pawmsak a ni lo bawk.

100%-a chak inring Ashley

Bengaluru manager Ashley Westwood chuan, "Referee sawisel hian awmzia a awm lo, an insiamṭha duh lo. Penalty ngei ngei tur vawi hnih min pe lo a, kan chance neih kan khung loh kan vanduai pui bawk. Amaherawhchu second leg-ah erawh kan chak ang, away goal rule hman pawh a ṭul lo ang. 100% in semifinal kan lut ang," tiin a hlauthawng lo hle.

Jahar a inngaitlawm

Aizawl FC coach Jahar Das chuan, "Referee-te'n club lian an ṭan fo a, hei hi India ram kalphung a ni. Tuna kan chak avang hian kan dinhmun a ṭha sawt a, amaherawhchu semifinal lut chiang erawh kan ni lo. Bengaluru FC hi team ṭha an ni a, Federation Cup champion lai an ni ringawt lo. I League an champion hnuah AFC Cup knockout stage an lut leh tawh a, fimkhur taka kan khelh a ṭul dawn a ni," tiin a sawi.

Offside leh offside lo

Stadium aṭanga inkhel entu tan chuan assistant referee-in ṭum hnih ngawt Bengaluru FC tana lawmna turin thutlukna a siam a, Mizo mipui inkhel entu lungawi lo au hla chu 'linesman out' tih a ni. Amaherawhchu replay aṭanga en nawn a, football dan bu keu chuan assistant referee thutlukna 'mak' hi a dik hmel tlat!

Bengaluru goal : Eugeneson Lyngdoh-a'n yard 25 vel aṭangin goal-ah a pet a, Kim Song Young kap karah lutin Aizawl FC keeper Soram Porei a che lo. Stadium aṭanga entu tan chuan North Korean striker hi chiang takin a offside niin a lang a, amaherawhchu Eugneseson-a'n ball a petchhuah chiah hian Kim Song leh goalline inkarah Soram Poirei leh Lalruatthara an la awm avangin assistant referee-in flag a phar lo kha a tidik chiah. Mipui tana hmuh harsatna chhah erawh Ruatthara'n offside trap siam tumin a tlan hma thut a, chu chuan Bengaluru striker kha offside angin a lantir.

Aizawl FC goal pawm loh : Minute 84-naah Lalchhawnkima ball vawrh luh chu Alfred Kemah Jaryan-a'n a um lut a, Blues keeper Amrinder Singh chuan pet chhuak sualin William Lalnunfela zawnah tak a pet. Goal-ah keeper awm tawh lo mah se Kolasib tlangval hian a pet fuh tawk lo a, Alfred-a zawnah kalin Liberian striker hian goal net puar pawpin a pet lut. Mipui leh Aizawl FC player te'n goal emaw an tih hnuah assistant referee-in offside vangin flag a phar a, thutlukna dik siam mah se a phar tlai lutuk erawh a fuh chiah lo.

FIFA Laws of the Game Law 11-ah chuan offside chungchang chu heti hian a inziak, "Player chu ball leh a khingpui hnuhnung ber dawttu aia an khingpuite goalline a hnaih chuan a offside". Aizawl FC striker Alfred kha ball leh Amrinder Singh (a khingpui hnuhnung ber dawttu) aia Bengaluru goalline a hnaih avangin a offside. Football dan hian keeper ang zawngin a ziak lo a, offside lo tur chuan Alfred-a hmaah khan player pahnih an awm ngei ngei a ngai a, Blues defender Lalchhuanmawia chiah a awm avangin Liberian striker hi a offside a ni.