Ramhlun Venglai an champion
9th CYMA Inter Branch YMA Cricket Tournament final-ah, Ramhlun Venglai chuan run 17-a Durtlang hnehin an champion.
Inrinnia final hmuhnawm tak Suaka Memorial Cricket Ground, Sihhmuia inkhelah Ramhlun Venglai opener run 48 siamtu Vanlalrinzuala chu man of the match-a thlan a ni a, tun inelnaa wicket sarih latu Ramhlun Venglai bowler Ngurdingliana chu best bowler-ah thlan a ni bawk.
Durtlang batsman K. Vanlalruata'n final-ah half century siamin a team chakpui zo lo mah se, tournament pumah run 209 siamin best batsman-ah thlan a nih bakah man of the series a ni bawk.
Final chu
Curator-te thawhrimna zarah final khelhna pitch a ṭha a, bowler leh batsman tan lungawina tur a ni. Toss-a vannei Durtlang lamin vawm hmasak an thlang a, bul an ṭan fuh bawk.
RVL rawlthar Lalṭhakima chu Durtlang fielder Lalhruaizela'n Mizoram U14 tana a khelhpui Marty-a bowling-ah mawi takin a catch out nghal. Vanlalrinzuala leh Malsawmdinpuia te inkawpin fimkhur tak leh run rate tla miah si loin innings over 10 thleng an bat a, Durtlang lamin wicket an la hlethei lo.
RVL lamin wicket an ngah bawk nen, run rate an siam ṭha chho zel a, target sang siam an tum lamah wicket an hloh ve ta pheuh pheuh. Vanlalrinzuala pawhin half century a tlin pha lo chiah a, run 48 siamin a out. RVL captain Robert Lalfamkima a tawp lama bat tura lo lut chu, Durtlang player-te'n Guard of Honour an lo pe a, veteran player hian zahna pek hi a phu. Ramhlun Venglaiin run 144 siamin wicket ruk hlohin target 145 an siam.
Tun tournament-a mimal score siam hnem tam pahnih K. Vanlalruata leh Lalhruaizela an neih avangin target hi umphak theih a ni a, over hnih a nih meuh chuan run 19 an siam der tawh. Amaherawhchu Lalhruaizela chuan a partner Ruata vuak theih lai chu a ṭawiawm ṭha tawk lo a, run khat chiah siamin over thumnaah a out. Durtlang hian over 10-ah run 59 siamin wicket khat chauh an hloh a, over khata run riat zel an siam theih chuan chak thei an ni.
India sub junior team tana khel tawh Ruata a inlar a, ball 34 lekah half century a siam a, Michael-a vawmah vawi hnih six runs vuain pakhat zawk phei chu stadium pawnah a chhuak hial. Ruata hi half century a siam hnuah run rate tihṭhat a tum lutukna lamah RVL spinner Lalmuanzuala'n a vawm hlum.
Over 5 la awmin Durtlangin run 53 an la mamawh a, wicket sarih la nei bawk mah se best bowler-a thlan Ngurdingliana'n run thum chauh pein wicket khat a rawn la, he over hian inkhel a tidanglam. Over 20 a tawp chuan Durtlangin run 129 siamin wicket 6 an hloh a, RVL te chuan run 17-in Durtlang an hneh.
Ramhlun Venglai hi CYMA Cricket-ah a vawi thum nan an champion a, champion ngun ber Chanmari vawi khat chiahin an pha ta lo.
CYMA Cricket Champion
2003 Armed Veng
2005 Chanmari
2006 Ramhlun Venglai
2007 Durtlang
2008 Ramhlun Venglai
2009 Chanmari
2011 Chanmari
2013 Chanmari
2016 Ramhlun Venglai