AMC sorkar kal mek hun a tâwp; Administrator-in a enkawl rih dawn

AMC chungchangah hian December 7, 2020 khan nodal department UDPA changtu deputy chief minister Tawnluia'n AMC awm zel dan tur thuthar thehdarhtute hmaah a puang a; AMC term chu December 9 zanlai dar 12-ah a tàwp dawn tih sawiin, December 10 aṭanga sorkar thar a pian leh hma zawnga AMC enkawltu (administrator) atan Mizoram sorkarin AMC commissioner K Laldingliana a ruat thu a puang.

Municipal council/corporation chungchanga Mizoram sorkarin dan a siam, 'The Mizoram Municipalities Acts, 2007' Section 22-in a sawi angin, AMC term hi kum nga a ni a; chu chu Board of Councillors ṭhutkhawm hmasa ber (first meeting) aṭanga chhiar ṭan tur a ni. First meeting hi AMC inthlan zawh hnua sorkar lak luh ní a ni a, AMC term tawp ta chu December 10, 2015-a lak luh a ni.

AMC dan ang chuan, AMC councillor term pawhsei theihna dan ziah lan a awm lo a, term a tàwp a, sorkar thar din theih a la nih loh chuan administrator-in a enkawl tur a ni. AMC sorkar hmasa ber November 16, 2010-a din pawh councillor thar thlan hma, November 16, 2015-a a lo tawh tawh a, November 16, 2015 aṭangin administrator atana ruat Aizawl DC-in a lo enkawl tawh a ni.

AMC-ah hian ward 19 a awm a, inthlan apiangin seat paruk chu hmeichhe tan hauh a ni. AMC inthlan leh huna hmeichhe seat tur chu May 12, 2020 khan pawh a lo ni tawh a, chungte chu - ward no. III, VII, X, XIV, XVI leh XIX-te a ni.

AMC inthlana hmeichhe seat tur

1.    Ward-III    Ramhlun North, Ramhlun Venglai, Ramhlun Vengthar, Ramhlun Sports Complex, Laipuitlang

2.    Ward-VII    Armed Veng, Armed Veng South, Chite

3.    Ward-X    Chawnpui, Zotlang, Zonuam, Govt. Complex

4.    Ward-XIV    Khatla, Khatla South leh Mission Vengthlang

5.    Ward-XVI    Bethlehem Veng, Bethlehem Vengthlang, College Veng

6.    Ward-XIX    Kulikawn, Tlangnuam, Saikhamakawn, Melthum, Hlimen