Italy-ah Juventus an ropui ber
Khawvel ram hranga hrang zinga football an ngainatna ber hmun pakhat Italy-a vawi khat champion nih ringawt pawh a harsat laiin Juventus chu a ṭum 32 nan Serie A champion an ni leh ta. Italian football-ah anni aia record nei ṭha an awm lo.
Karhmasa Thawhṭanni zana Roma-in Napoli an hneh khan Juve hian a zawna a vawi nga nan Serie A nomawi an chawi dawn tih a chiang tawh a, Massimiliano Allegri naute hian an champion hnuah pawh inthlahdah chuang loin Pathianni zan khan an mikhual Capri chu 2-0 in an hneh.
Juventus Stadium-a inkhelah hian midfielder Hernanes chuan firsthalf tawp hma chiahin goal hmahruai a khung a, forward Simone Zaza-a'n minute 80-naah an goal hnihna khungin Old Lady (Juve sawina) an chak chiang. Juve hian point 88 hmuin pahnihna match khata khel tlem zawk Napoli chuan point 73 an nei thung a ni.
Beisei loh lamah
Antonio Conte kaihhruaina hnuiaah Juve hian kum 2011-2014 khan Serie A nomawi ṭum thum an chawi a, hemi hnu hian Itlaian manager hian an ram Italy national team enkawl hna a thawh san.
Kum 46-a upa Conte hmunruak luah tur hian AC Milan lo enkawl tawhtu Allegri lakluh niin Juve fan-te aṭangin an manager thar duhlohna thawm a lian hle. Mahse, Turin club hian league nomawi bakah Coppa Itlaia-ah an champion avangin an manager hi an pawma ngaih a ni.
Tun season ṭan dawn khan Juve hian an player pawimawh Carlos Tevez, Arturo Vidal leh Andrea Pirlo te an chhuah tir a, league match an khelh hmasak 10 aṭangin point 11 chauh hlawhchhuakin table-ah 12-na dinhmun an luah! Manger atana an lakluh dawna dodal tawk Allegri ban duhtu thawm a ri ring leh hman hle.
Amaherawhchu, October 2015 a herliam dawn meuh chuan Juve hian Torino 2-1 in an hneh a, hemi hnu hian an hawikir tawh lo chiang hle. League match 26 an khelh zui aṭangin vawi 25 hnehna an chang thei. Vawi khat chu an khingpuite nen inhnehtawkin point 78 hmuh theih aṭangin point hnih chiah an hloh. Tun hnai an khelmuala an match hnuhnung 10-ah phei chuan goal an chhuah miah lo.
UCL tur a chiang
Pathianni inkhel dangah Inter Milan chu Lazio lakah 2-0 in an tlawm a, Roberto Mancini naute hian point 64 chauh an la hmuh avangin match hnih khelh hmabak la nei mah se season thara Champions League khelh an beiseina a tawp zui. League table-a pahnihna leh pathumna Napoli (73) leh Lazio (71) te erawhin Champions League an khel dawn tih a chiang nghal thung.
Allegri thukhawchang
Season a la tawp loh thu sawiin Juve manager Allegri chuan, "Hnehna kan chan avangin ka lawm a, kan khelmualah fan tam tak te kan hlawhtlinna lawm tura an lokal khawm hian min ti hlim zual. Tunah chuan league match pahnih khelh tur kan la neih leh Coppa Italia final kan khelh tur kan la ngaihtuah a ṭul," tiin a sawi. May 21 khian Juventus leh AC Milan te chuan Italian cup final an la khel leh dawn a ni.
Champions Legaue thlir zuiin Allegri chuan, "Season thara kan hmathlir pawimawh tak tur chu Champions League a ni ang, tun hnai season hnih chhungin team
ṭha ber zinga mi ni mah ila kan hlawhtling zo lo. Serie A chu kan ngaihthah thiang lo nachungin Europe lamah insiamṭhat ngaihna kan la ngah zawk," tiin a sawi.
Season hmasa khan Juvn hian Champions League final-ah Barcelona an hneh lo a, tun season-ah pawh last 16-ah German champion Bayern Munich an hneh lo leh a ni.