Madrid Open-ah Angelique Kerber a chak lo nghal

Angelique Kerber chuan inrin-tawkna sang tak nen Madrid Open khel mah se a match hmasa berah beisei ang result a nei thei lo. Pathianni zan khan Barbora Stryco-va lakah straight set-in a chak lo a ni.

Australian Open champion Kerber hian Pathianni hmasa khan Laura Siegemund hnehin Stuttgart Open title a chawi a, inrintawkna a neih san lai a ni. Mahse, Madrid-ah hian 6-4, 6-2 in a chak lo nghal.

World number 2 Agnieszka Radwanska pawhin result ṭha a nei bik lo a, Dominika Cibulkova lakah 6-4, 6-7, 6-3 in a chak lo bawk a ni.

WTA Madrid Open-ah hian damlohna vangin world number 1 Serena Williams chu tournament ṭan dawna ruaiah an lo inhnuhdawh tawh bawk avangin player langsar vak lo te tan champion theihna kawng a inhawng zau dawn niin a lang.

Inkhel dangah Victoria Azarenka erawhin a khelh ṭhat a chhawm nung zel a, a zawna match 15 chhung hnehna a channa ni turin Laura Robson chu 6-4, 6-2 in a hneh.

US Open finalist Roberta Vinci leh world number 1 hlui Ana Ivanovic te pawhin first round an paltlang ve bawk.