NBA Conference Semifinals Blazers lakah Warriors chak nghal

Golden State Warriors chuan NBA Conference Semifinals Game 1-ah hnehna an chang nghal, nimin zing khan Trail Blazers chu 118-106 in an hneh. Nialiani zing dar 8:00-ah game 2 an khel leh ang.

Oracle Arena, Oak-land-a inkhelah hian Warriors tan Klay Thomp-son a khel ṭha lehpek hle a, point 37 score-in an team-ah ani aia thawhhlawk
an awm lo. Power forward Draymond Green hian post season-a a vawi
khat nan triple-double a nei a, assist vawi 11 a neih bakah hian point 23 score-in rebound ṭum 13 a la bawk.

Warriors hian hliam vangin Most Valuable Player Stephen Curry la chhawr thei lo mah se inkhel bul an ṭan
ṭhat an chhawr ṭangkai a, quarter hmasa berah 37-17 ngawta hmahruai falin quarter hnihna leh a hnuhnung berah a hniam zawkah ṭang mah se an dingchang ta zawk a ni.

Heat leh Raptors tlang

Eastern Conference Playoffs lamah Pathianni zan khan Miami Heat chuan Charlotte Hornets lakah 106-73 in hnehna an chang a, best of seven series-ah 4-3 a hnehna changin Conference Semifinals an lut.

Nimin zing khan inkhel inhnehtawk takah Toronto Raptors chuan 89-84 in Indiana Pacers lakah hnehna changin Conference Semifinals an lut ve bawk a, Miami Heat nen an inhma-chhawn leh dawn a ni.